– Kari er kul og rå!

I haust, frå premieren 26. september, har 13 jenter deltatt og konkurrert i det nye konkurransereality-programmet Kari Traa-leikane, som har vore sendt på TV3.

Blant dei er Karoline Hille Nordstrønen (26), som vaks opp i Hagavik og i Varåsen, og som no bur i Bergen og jobbar som tattovørlærling.

– Eg såg reklame for programmet og diskuterte det med nokre venninner. Dei var pådrivarar og fekk meg til å søkja, fortel Karoline til Midtsiden.

Programmet blei spelt inn på Voss, i drygt fire veker frå mai til rett før Ekstremsportveko starta i juni.

I morgon viser TV3 finalen, med Karoline som ein av to finalistar. Motstandar er Emilie Bratt Jakhelln (25) frå Oslo.

– Utruleg kjekt å delta

Deltakarane kjempar om å bli Kari Traa sin ambassadør, eit engasjement i firmaet til den tidlegare OL-vinnaren i kulekjøring, som no gjer suksess med eige motemerke.

– Det var utruleg kjekt å vera med, å bu på camp på Hanguren, skjerma for omverda, utan mobil og internett i over fire veker.

– Kvar morgon var vi like spente, kva skal vi i dag. Vi har jo fått vera med på utruleg mykje kjekt. I tillegg var det veldig gøy å bli kjent med Kari og Hans, Kari er rå og vossingane har ein kul humor!

Sjølv har Karoline ikkje vore aktiv med ekstremsport, men hatt sans for surfing og snowboard.

– Eg blei skuffa då eg ikkje klarte teorien og derfor ikkje fekk hoppa i fallskjerm med dei andre. Men det var desto deiligare då vi dagen etter fekk hoppa i tandem alle saman.

Gode venar – god TV

Programmet har framstått som friskt og sprekt, men utan intrigar og spisse albogar deltakarane imellom.

– Vi var tretten veldig ulike jenter, men hadde det veldig fint saman, og bortsett frå medan konkurransane sto på så oppførte vi oss ikkje som konkurrentar.

Det er dessutan Kari Traa i samråd med Hans Engelsen Eide frå Skigutane som har valt deltakarar ut i duell frå sending til sending, ingen direktesending med utstemming av tv-sjåarar.

– Det har også vore god stemning mellom oss jenter etterpå. I haust var seks av oss saman på smalahove-middag på Voss.

Finalemotstandar Emilie er den Karoline har hatt mest med å gjera etterpå. Dei har halde kontakten per telefon og vore på besøk hos kvarandre i Oslo og Bergen.

Fleire leikar på Voss?

I morgon er det finale og TV3 har fram til finalen opplevd eit snitt på 81.400 sjåarar per program.

– I tillegg kjem 8500 visingar per veke på TV3play.no, seier informasjonskonsulent Andreas Framnes i TV3/Viasat 4.

– Det har vore stor aktivitet og massiv respons på sosiale medier, det synes vi både er veldig gøy og veldig fortjent.

– Kjem det fleire Kari Traa-leikar i åra som kjem?

– Vi er svært nøgd med programmet og jobben dei tretten deltakarane har gjort, men det er førebels for tidleg å seia om det blir fleire rundar.

Finalen går på TV3 frå klokka 20.30 torsdag 5. desember.

Dei tidlegare episodane kan du sjå på TV3play.no.