Ungdomsprosjektet hos Amcar Askøy vann «folkets pris» på dagens Os-treff. Prisutdelar Frank Hetleflåt frå Os Amcar. (Foto: Kjetil Vasby Bruarøy)

Kåring: Dei finaste bilane på Os-treffet

Rekordmange 137 amcars var utstilte på Amfisenteret i dag. Her er dei finaste.

image
image
image
image
image
image
image
image
image
image
image
image
image
image
image
image
image
image
Av: Kjetil Vasby Bruarøy

I fjor opplevde Os Amcarklubb rekord med 102 utstilte bilar på Os-treffet.

I år var treffet flytta til AMFI Os. Vêret var finare og utstillarane endå fleire.

– Vi har hatt 137 utstilte bilar, så rekorden frå i fjor blei knust med god margin, seier speaker under kåringa på slutten av treffet, Morten Monsen.

– Det har vore ein fryd å stilla ut her nede. Vi har fått bruka toaletta inne på senteret, vaktmeisteren har vore veldig hjelpsam og kjøpmannen på søndagsopne COOP har vore venleg innstilt til at mange av parkeringsplassane har vore opptatt gjennom dagen.

– Det MÅ vera V8

Publikumstalet har òg vore godt. Opp mot Byvegen sto hoppeslott og fleire utstilte bilar, plasseringa har vore god marknadsføring for gratisarrangementet.

To av gjestane, Gunnar Lyssand og Arne Thuen, synest det var rikeleg med fine bilar å sjå på.

– Du må snakka med Arne, han var jo den første som fekk ein skikkeleg bil til bygda, seier den elles så pratesalige Gunnar.

Handbaklegenda Arne Thuen er glad i mykje av det amerikanske, ikkje minst bilane. Han starta med Challanger cabriolet, den første i Noreg, og følgde opp med ein gul Corvette, ein '66 Mustang convertible, ein '67 Fastback, den første i Noreg med manuell gir, ein '68 Camaro, ein '78 Trans Am og seinare ein Pontiac.

– Kva bil har du no?

– Ikkje noko av same kaliber, eg har ein Grand Cherokee. Men den har sjølvsagt V8. Når du først har hatt V8 så er det ingenting anna som duger, påstår Thuen.

Dei finaste bilane

Os-treffet varte frå klokka 11 til 15. Den siste timen var det kåring av finaste bil i ulike klassar.

Ann-Kristin Thuen og Frank Hetleflåt var i juryen som kåra beste bil i dei to klassane van/pickup og personbil.

VAN/PICKUP
1. plass: Jeep 1960 (Hans Knarvik)
2. plass: Chevrolet van 1993 (Edvin Johansen)

PERSONBIL:
1. plass: Dodge Charger 1988 (Hans Otto. Ikkje i bildeserien over, vinnaren var køyrd)

«Peoples choice»

Publikum hadde fått stemmesedlar, og dei åtte bilane med flest stemmer blei køyrde inn for å kjempa mot kvarandre to og to.

Her fekk publikum eit farga ark der dei stemte vidare vinnar per par til fire bilar sto igjen i semifinale, og vidare til bronsefinale og finale for å kåra topp tre.

1. plass: Mercury Marquise 1970. Ungdomsavdelinga i Amcar Askøy .
2. plass: Cadillac Coupe de Ville 1958. Eigar: Ståle Sulen.
3. plass:500 GT Shelby. Ellinor-bil/Gone in 60 seconds. Eigar: Frank Georg Fosse.

– Den er styla av den berømte designeren Chip Foose, han som står bak Ellinor-bilen kjend frå filmen Gone in 60 seconds. Eg kjøpte den i vinter av ein frå Sotra, fortel Fosse.

Mens Fosse har fått bilen «ferdig» har Sulen på 2. plass hatt meir å jobba med.

– Eg har hatt denne cadillacen i seks år og har tatt alt, frå motor, som er original, til interiør og lakk. Det har vore mykje jobb, men det er kjekt òg.

Vinnarane stilte med eit imponerande ungdomsprosjekt av ein bil. Mercuryen blei kjøpt for to år sidan og er pussa opp av åtte ungdomar i klubben, fem gutar og tre jenter. Bilen er plukka frå kvarandre, og sto ganske ribba så seint som i april (sjå i bildeserien).

– Ungdomane har lagt ned eit imponerande stykke arbeid. Onsdag skal vi ha avduking ved ordførar heime på Askøy. Dette blei ein av fleire snikpremiar, seier Johnny Lillefoss frå Amcar Askøy.

– Bagasjelokket blei lakkert klokka 1.30 natt til 10. mai, så vi rakk vårmønstringa i Bergen. Det er viktig å få med seg nokre treff på sommaren. Det gir inspirasjon til dei lange vintrane på verkstaden.