– Kjekt å konkurrera

Bildeserie:

1 av 6

– Sist Bergensmesterskapet blei arrangert var i 2007. Eg var veldig glad då to av våre ville stilla opp når meisterskapen no er tilbake, seier dagleg leiar ved Lundehjørnet, Kari Rekkum.

For ei veke sidan var ei rekkje frisørar samla på Hotell Norge i Bergen for å konkurrera om tittelen Bergens beste frisør i ulika kategoriar.

Frå Lundehjørnet stilte lærlingane Thanh Thi Dang med modell Silje Totland og Linn Hindenes med modell Morten Njaastad Havre.

Thans stilte i klassen brud og Linn i klassen "full fashion".

– I "full fashion" skal modellen også vera modell for klede og tilbehør frå topp til tå.

– Eg var heldig og fekk låna klede og sko av nabobutikkane her i Os sentrum, Instinct og T Moberg Sko, fortel Linn, som imponerte med ein fin 3. plass i konkurransen.

– Gav meirsmak

Etter førebuingar og frisering på salongen i Os bar det førre helg til Radisson Blue Hotell Norge i Bergen for styling.

– Det var veldig spennande å delta. Vi fekk ei bestemt tid å gjera oss ferdig på og så gjekk dommarane rundt og såg medan vi skulle vera vekke frå modellen, fortel Thanh.

Etterpå var det fest på hotellet og premieutdeling til dei som fekk best plassering.

– Dette var veldig gøy, og det kjem nok til å bli fleire konkurransar på oss, blant anna Colour 2000 og NM neste år, seier dei to.