Kjempefangst i Canada

Bildeserie:

1 av 4

Fredag reiste Peter Moesgård og Brynjar M. Ulvatne saman med dei to danskane Michael Amstrup og Niels Thomsen til Mission aust for Vancouver for å fiska laks.

– Vi har fått enormt med laks, men visste at det også låg til rette for større fisk, Fraser River er kjent som "hovudstad" for stør-fiske, fortel Peter.

Etter å ha tatt 60 til 80 laks, fire ulike artar (kongelaks, sølvlaks, rødlaks og hundelaks/chum, coho, cinook og pink) fekk dei søndag større beist på kroken.

Då drog dei inn ein stør på 245 centimeter og 150 kilo!

– Vi brukte cirka 20 minutt på å taua den inn. Eg har ikkje vore så sliten på mange år, seier Moesgård.

– Peder'n var mållaus og heilt stille i over ein time. Det seier sitt, meiner Brynjar om den elles så pratsame kameraten, og humrar godt i bakgrunnen.

Kan få ein endå større

Stør ser ut som hai, men er tannlaus og lever både i sjøen og i ferskvatn.

Det finnest 26 artar, laget frå Os drog inn ein kvitstør.

Les meir om stør på Wikipedia.

– Støren er freda og den vi tok er truleg 80 år gamal. Vi sleppte den laus.

– Det var ein tung kamp, men vi skal sjå om vi klarer å slå årsbeste i elva. Den var visst 11-12 for og 600 kilo, fortel Peter.

Reisefølgjet blir verande i Mission i til saman to veker.

– Vi har det supert her! Vi bur i ei fiskehytte heilt ved elva og har alt vi treng, også båt og guide på elva.

– Turen kostar ikkje meir enn ein fisketur til Trøndelag, einaste minus er at det regnar enormt mykje, fortel Peter og Brynjar.