Sport | 22. okt. 2013

Kjetil skåra - laget vann 18-0!

Lysekloster 2 fekk ein svært målrik slutt på sin første sesong i 5. divisjon: – Eg trur det er den første skåringa mi på 10 år, seier keeper Kjetil Hansen (25).

Kjetil Hansen har stått godt for Lysekloster når han har vore heime frå Bodø. No har han også eit mål på CV-en. (Arkivfoto: KVB)
Kjetil Vasby Bruarøy
Kjetil Vasby Bruarøytirsdag 22. okt. 2013 20:34

Medan førstelaget til Lysekloster har gått sin sigersgang frå 7. til toppen av 3. divisjon har det ganske nyetablerte andrelaget også gjort suksess.

Først i opprykk frå 7. til 6. og 5. divisjon, så ved å halda seg gjennom årets sesong.

Resultata har svingt noko, men laget har ikkje vore truga av nedrykk, og søndag fekk dei ein svært målrik slutt på sesongen.

Lysekloster 2 - Vadmyra 2 18-0 (11-0)
Målskårarar, Lysekloster 2: Kim Krogsethagen 6, Jan Even Frøyset 4, Stefan Bernsen 3, Fredrik Hjelmtveit, Christian Almeland, Kjetil Hansen (keeper) og Preben Skorpen.

Kim Krogsethagen blei toppskårar i storsigeren, som gjekk mot eit Vadmyra 2 med 10 mann og ingen innbytarar.

På skåringslista finn vi også keeper Kjetil Hansen.

– Eg hadde kanskje nokre nettkjenningar då eg spelte på gutelaget, og av og til var utespelar. Men det er lenge sidan no, seier den 25 år gamle Lysekloster-keeperen, som var heimom ein tur frå politistudiane i Bodø.

Lysekloster 2 gjekk opp i 9-0 på straffe, og då gav Hansen beskjed; «får vi fleire straffar så vil eg ta den».

– Det er lenge sidan førre gong og det blir truleg ei stund til neste òg. Var du nervøs?

– Det ville jo vore kjipt å missa, men eg var ikkje nervøs. Eg hadde bestemt meg for å skyta hardt til høgre for keeper, og det gjorde eg. Keeper sto dønn i ro, men skotet var så hardt at eg trur ikkje han ville tatt det uansett, seier Kjetil.

Lysekloster 2 landa på 8. plass på tabellen i avdeling med til saman 12 lag.

Berre eitt lag i avdelinga (Trott på 5. plass med 79 mål) har skåra fleire enn Lysekloster 2 sine 72 mål på 22 kampar.

SJÅ TABELL

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.