Kjøpte bil i førre veke - mista eit hjul i går

Onsdag i 19-tida blei politiet kontakta av ei kvinne som hadde mista eit hjul.

– Dette skjedde på Byvegen, men bilen sto sånn at den ikkje var til hinder for trafikken, fortel politioverbetjent Anne Lyssand.

Bileigar fortalte at ho kjøpte bilen i førre veke.

– Dette blei ikkje ei politisak, men det er mogleg at det blir ei form for oppgjer mellom seljar og kjøpar, gjerne via forsikringsselskap.

Klokka 19.41 fekk politiet melding om ein bil som køyrde vinglete på Byvegen og tok av mot Ulven.

– Bilen skal ha køyrd opp og ned i fart, bråbremsa då det kom bil imot og køyrde i periodar delvis over i motsett køyrefelt - ifølgje meldar.

Ein patrulje fekk stoppa bilen. Der sat eit eldre ektepar.

Mannen som køyrde bilen kjente seg ikkje igjen i skildringa av køyremønsteret. Han bles også til null promille.

Klokka 22.19 i går blei ein hjort påkøyrd på Hegglandsdalsvegen.

Bilen var skadd, men var køyrbar. Det står ikkje notert om hjorten blei liggande igjen eller stakk frå staden, men viltkontakt blei uansett varsla.

I 17-tida i går var det ein pipebrann på Søfteland.

– Det var udramatisk, men huseigar har fått fyringsforbod inntil vidare.

Ved pipebrann kjem brannvesenet på inspeksjon etter at pipa har blitt kald.