Tidlegare sal- og marknadssjef i Odin Solutions AS, Trond Soltvedt, er no direktør i Valhall, som kjøpte buet etter Odin. (Foto: Valhall/Kjetil Vasby Bruarøy)
Tidlegare sal- og marknadssjef i Odin Solutions AS, Trond Soltvedt, er no direktør i Valhall, som kjøpte buet etter Odin. (Foto: Valhall/Kjetil Vasby Bruarøy)

Kjøpte Odin Solutions

Odin Solutions AS er konkurs. Valhall NGP AS, med fleire tidlegare Odin-tilsette, har kjøpt konkursbuet.

Kjetil Vasby Bruarøy
02. april 2016 - 8:26

I februar fortalte Kjetil Moberg om betre utsikter etter ein tøff periode for selskapet hans, Odin Solutions AS.

Salet kom i gang igjen etter oljekrisa og han klarte å betala krava som hindra konkurs.

Tidleg i mars blei det dessutan inngått forlik med Termorens AS, eit selskap som i utgangspunktet skulda Odin for å etterlikna eit av produkta deira. Men seinare same månad, 17. mars, kom ny konkurbegjæring, og kravet frå Kemnaren klarte ikkje Odin å innfri i tide.

Valhall har overtatt

Selskapet Valhall NGP AS, som driv i same bransje, fortel at dei har kjøpt konkursbuet.

– Vi har overtatt alle rettar til Odins produkt, varemerke, sertifisering og godkjenningar, seier administrerande direktør Trond Soltvedt til Midtsiden.

Valhall NGP AS blei stifta i desember i fjor. Alle dei tilsette har tidlegare jobba i Odin Solutions.

– Kva drift har selskapet hatt inntil kjøpet av konkursbuet?

– Vi har produsert liknande produkt og opererert i same bransje, det har vore full drift frå start.

Valhall har base i Bergen Malingfabrikk sitt lokale i Godvik. Selskapet er eigd av Einevoll Invest.

Moberg: – Har to alternativ

Kjetil Moberg seier han kjem til å anka konkursen og kjempa for å få selskapet tilbake.

– Det andre alternativet er at eg startar opp på nytt. Eg har finansiering klar.

Midtsiden kjem med meir om saka over helga.

Les meir om

Næringsliv Industri