Kjører 1 av 3
Oseana satsar i år på eit spennande sommarprogram, men har måtta trappa litt ned.
I fjor opna nye Oseana med ein folksam og vellukka opningsfest som gjekk over ti dagar. Så følgte ein roleg sommar før det tettpakka haustprogrammet kunne starta, også det med svært godt besøk på dei fleste arrangementa.
– Denne sommaren ville vi prøva å skapa liv på Mobergsneset og satsa på eit innhaldsrikt, variert og innimellom litt stjernespekka program, seier direktør Kim Kristoffersen.
Ei rekkje kammerkonsertar får følgje av blant andre Viggo Sandvik og Göran Fristorp og sommarshow med Jonna Strømme, Cecilie Steinmann Neess og Nils-Ingar Aadne i Oseana sitt sommarprogram.
Frå 3 til 1 sommarshow
– Mange scenar i fleire store byar er heilt utan aktivitet om sommaren, medan andre, maritime småbyar har fullt program.
– Vi håper Os, med sine hyttefolk og båtturistar, kan høyra til i siste kategori, men førebels har vi nok eit stykke igjen før sommarferien blir høgsesong i kulturhuset.
KammerScenen i Griegsamlinga har vore i bruk kvar søndag sidan St Hans, med bra med publikum. Men sommarshowet er redusert frå 3 til 1 framsyning.
– Vi hadde for få selte billettar til å kjøra tre kveldar med dette sommarshowet, så derfor har vi redusert til kun å kjøra sommarshow 28. juli.
Møter Taube på torsdag
No håper Oseana-leiinga på god respons på det eine sommarshowet dei har igjen - og på Sandvik og Fristorp sin kritikarroste konsert, "Prøysen møter Taube", som går av stabelen førstkomande torsdag.
– Det blir nok stemningsfullt å bruka Oseana UteScene, å sitja der og høyra perler som " Nå seiler vi på Mjøsa" og "Rosa på ball" medan vi nyter utsikta over Bjørnefjorden, seier Kristoffersen.
– Om ikkje vêret blir bra så flyttar vi konserten inn.