Kjørte for fort - 47 gongar!

Ein 35 år gamal mann frå Aust-Europa har på eitt og eit halvt år blitt tatt 47 gongar i fartskontroll.

Ved 11 av desse målingane dekka han ansiktet medan han blei knipsa av fotoboks (ATK).

Fartsmålingane har skjedd fleire plassar i Hordaland, men også i nabofylka, i ein periode frå 10. april 2011 til 25. oktober 2012.

109 km/t i 60-sona

Dei fleste målingane er på låg fartsoverskriding.

Men 35-åringen er blant anna målt til 116, 119, 120 og 127 km/t i 80-sona, 111 km/t i 70-sona og 109 km/t i 60-sona.

Frå juni til oktober 2012 blei han dessutan tatt 11 gongar for kjøring utan gyldig førarkort.

"Blei blenda av blitsen"

Måndag 13. mai møtte han i retten og erkjente forholda.

Han forklarte at han enkelte gongar hadde dekka ansiktet fordi det var så skarpt lys frå blitsen, men innrømte at han ved enkelte tilfelle gjorde det fordi han visste at han kjørte for fort.

Mannen, som har utanlandsk førarkort, blei dømt til 90 timar samfunsstraff og til tap av førarretten i 3 år. Han må ta ny, norsk, førarprøve for å kjøra bil i Noreg igjen.