Kjørte på land - og vann 8-0

Laurdag var andrelaget til Os til Rosendal for å spela 17. serierunde i 5. divisjon.

Trass båtulykke på vegen og hektisk ankomst enda kampen med Os 2 sin femte siger på rad med overbevisande 8-0 som sluttresultat.

– Vi reiste klokka 12.05, knuste i kaien på Tysnes klokka 12.30, kom til kai i Rosendal klokka 14.15 og starta kampen klokka 14.45, tre kvarter etter oppsatt tid

– Det blei 10 minutt med oppvarming og 3 minutt med pause, så vi rakk bussen som gjekk heim igjen 10 minutt etter kampslutt. Det lukta ikkje blomstrar i bussen på veg heim, men vi er elles nøgd med dagen, seier trenar Terje Kvittingen.

Rosendal - Os 2 0-8 (0-6)
Målskårarar: Ramo Racic 4, Preben Borgen 2 og Egil Thuen 2

Kampen starta med 1-0-leiing ved Preben Borgen i 14. minutt før Ramo Racic, som skåra tre mål i førre kamp, auka til 2-0 og 3-0 i 23. og 26. minutt.

Preben skåra eitt til og Ramo to til før pause (34, 39, og 43.)

– Preben og Ramo viste tydeleg at dei ikkje skal spela så mykje med andrelaget i haust, i dag briljerte dei.

Egil Thuen skåra begge måla etter pause, 7-0 i 59. minutt og 8-0 i 79. minutt.

– Og vi treng ikkje hjelp frå førstelaget, andrelaget har skadefri tropp og sterk stall.

– Det er mange som fortener skryt i dag, men eg vil framheva Ørjan Håland som har kome i skikkeleg god form og er svært viktig både på og utanfor banen, ein skikkeleg leiartype, seier Kvittingen.

Os 2 er ikkje avhengig av andre sine resultat for å nå målsetnaden om opprykk til 4. divisjon igjen.

– Vi er botnsolide no, med siger i alle kampane etter ferien og 3 poeng mot alle topplaga. Vinn vi resten av kampane våre så rykker vi opp igjen til 4. divisjon, som er målet vårt for hausten.

SJÅ TABELL