Kjørte utfor og stakk av
Strøno: Politiet jaktar på det dei trur kan vera ein fyllekjørar.
Politiet rykte ut med minst to patruljar til Strøno etter at ein bil kjørte utfor vegen.
– Føraren stakk frå staden, fortel Ole Geir Magnussen, operasjonsleiar i Hordaland politidistrikt, til Midtsiden.no.
Politiet mistenker at føraren har noko å skjula og er derfor på jakt etter vedkomande.
Meldinga kom inn klokka 12.15.
– Det var ungar som meldte ifrå om at dei hadde sett ein bil i stor fart, som først var utfor på den eine sida av vegen, så hamna den opp i ein skråning på motsett side, fortel operasjonsleiar Svein Lyssand.
Ulykka skjedde ved krysset mellom vegen til Ervikane og vegen ned til den tidlegare butikken i Nordstrøno. Ut frå spora ser det ut som om bilen har hatt retning frå Ervikane mot skulen og mista kontrollen i høgresvingen ved busskuret.
– Nokon skal ha kome til og hjelpt føraren med å få bilen på vegen igjen. Politiet skal ha hatt kontakt med desse, men etter det eg kjenner til er det framleis uvisst kven føraren er, seier Lyssand.