Klar for treningskamp
Debut for trenar-Tim: I dag speler Os sin første treningskamp denne vinteren, heime på Kuventræ.
Os skal møta Nest-Sotra, Fyllingsdalen, Årdal og Østese i treningskampar før seriestart, og alle kampane skal gå på Kuventræ.
Men først ut er Bergen Nord, som Os tar imot i dag.
Bergen Nord rykte opp frå 4. til 3. divisjon i fjor og var då trent av Tore Nielsen, som no er tilbake som assistenttrenar for Os.
Tunge bein
– Denne veka har vi 9 treningsøkter, så det er nokre blytunge bein som kjem på banen i dag, seier Os sin nye trenar, veteranen som la opp som spelar hausten 2010, Tim Henrik Sperrevik.
Treningskampen er ein del av ei treningshelg med laget, Os har også ei treningsøkt i dag før kampen.
– Det er viktig å klara å prestera også når du er litt tung. Dette er først og fremst trening for oss, men det er klart at vinnarinstinktet er noko som også skal på plass i god tid før seriestart.
Ny stil – nye plassar
– Vi har nytt spelesystem som skal jobbast inn, vi vil sjå korleis enkelte relasjonar fungerer og vi har spelarar som skal få prøva seg på nye plassar, seier Sperrevik.
Tim var ikkje heilt klar med startellevaren då Midtsiden snakka med han etter treninga fredag kveld, men han fortel om 4-3-2-1-formasjon og at rundt 18 spelarar kan rekna med speletid i dag.
Blant dei som kan venta seg litt nye arbeidsoppgåver i morgon er kaptein Stian Lunde, som blir flytta bak frå midtbane til midtstoppar, og Preben Borgen, som truleg får ei rolle mellom spiss og midtbane.
Kampen startar klokka 16.