Klare for idrettsgalla

Rett før jul fortalte vi om Os Turnforening sine planar om å laga idrettsgalla i Oseana i januar.

Festen, som startar med middag og prisutdeling for medlemmar, for så å by på konsert for kven som helst som vil delta, blei utsett ein dryg månad.

– Arrangementet kom nok litt brått på etter jul, så vi utsette til no i februar. Det har ikkje vore halde ein liknande fest sidan 100-årsjubileet i 2005, no håper vi det skal bli eit årleg arrangement, seier dagleg leiar Hans Parnefält.

Dos amigos

Til å underhalda utover kvelden har Os Turn fått med seg Ole Reiner Berg-Olsen, Leif Østrem og Gina Aspenes, som i mellomtida har vunne Spellemannsprisen.

I kveld var dei tre, saman med musikarane Reidar Opdal, Eirik Larsson og Magnus Skylstad, på øving i Hordaland Studio.

– Dei bestilte tre band og fekk tre vokalistar, ler ORBO.

– Men vi har eit godt band i ryggen alle tre, og kjem til å kjøra noko éin og éin, og noko saman.

Både Leif Østrem (frå Fonos og Face2Face) og ORBO har stått på scenen med Gina før. På laurdag kjem også Leif og Ole til å ta ein duett eller to.

– Ole og Gina kjem sjølvsagt til å ta ein del av eigne låtar, sjølv har eg både Elvis og Travelling Wilburys på lista, fortel Leif.

Spreke musikarar

På spørsmål om kva idrett dei sjølv er best i, kjem det kontant frå Ole:

– Fiske. Skriv sportsfiske du, ler Ole, som verkeleg har fått smaken på båtlivet i Os.

– Neida, eg er nok best i basketball og roing, legg han til.

Gina Aspenes har lang fartstid i Oshallen. Ho var på kretslaget som keeper i handball i ungdomen, og har blant anna spelt mot tidlegare landslagskeeper Cecilie Leganger.

– Eg var høgreving, kjem det frå Leif Østrem, som hadde kallenamnet Kjappisen då han spelte for Jada og juniorlaget til Os.

– Du kan legga til at eg var keeper på gutelaget til Os, men at eg fekk lite speletid. Treff eg han som var trenaren min no når vi er i Oseana så kjem eg til å ta det opp med han, kjem det tørt frå Eirik Larsson.

150 til middag - fleire på konsert

Turn, friidrett, trampett, handball, fotball, amerikansk fotball og cheerleading, sjølv om det er 16-årsgrense på festmiddagen og 18 år for å bli med på konserten, har idrettslaget mange å ta av.

– Tanken er at vi har ein flott kveld saman på tvers av idrettane i klubben, for så å opna dørene så andre kan koma og delta på festen. Vi gjer dette som eit non-profit-arrangement.

Førebels er det selt drygt 120 billettar til festmiddagen, der Jan Helge Corneliussen har steppa inn for Magnar "Maggen" Lien som konferansier.

– Vi reknar med at det kjem nokre bestillingar utover onsdagen, som er siste frist.

– Kor mange som i tillegg kjem på konserten har eg ikkje oversikt over. Her sel vi også billettar i døra, fortel Parnefält.