Far og son på veg til nye eventyr: Dagleg leiar Jan Feste Mo og eigar Finn Mo er klare for å flytta Os Maskinering AS frå Industrivegen ved BiR til den nykjøpte Rolls-Royce-fabrikken ved Ulvensletta. (Foto: Kjetil Vasby Bruarøy)

Klare til å overta Rolls-Royce-fabrikken

Finn Mo kjem tilbake til start og gamle kollegaer når Os Maskinering AS overtar Rolls-Royce-fabrikken og rundt 20 av dei tilsette.

Av: Kjetil Vasby Bruarøy

I går blei det halde synkroniserte allmøte på Rolls-Royce Hagavik og Os Maskinering AS, Os Maskinering kjøper fabrikken, overtar fleire tilsette og aukar produksjonen for sin eldste kunde.

Les òg: Rolls-Royce-fabrikken er selt

– I dag utgjer leveransar til Rolls-Royce 10-15 prosent av omsetnaden vår, i 2016 blir oppdragsmengda frå denne kunden cirka fem gongar så stor, seier dagleg leiar i Os Maskinering AS, Jan Feste Mo.

Montering av styremaskinene blir flytta til Brattvåg, men Os Maskinering skal no stå for kjerneproduksjonen, i tillegg til å produsera til ettermarknaden på vinsjar.

Os Maskinering dobla omsetnaden frå 20 til 40 millionar frå 2011 til 2013 og vaks vidare til 44 millionar i 2014.

Selskapet har 27 tilsette og overtar 20 frå Rolls-Royce, i tillegg til lærlingar. Rolls-Royce skal dessutan leiga kontorlokale hos kjøpar og det er rekna med at 60-70 av dei tilsette blir verande i fabrikken.

Starta for 40 år sidan

Jan var berre eitt år gamal då pappa Finn starta Os Maskinering saman med Rolf Haugland i mai 1981. Finn er frå Modalen og flytta til Os då han gifta seg. Han fekk jobb hos Hydrawinch (som seinare blei kjøpt av Rolls-Royce) i 1975 og jobba der seks år før han og kollegaen starta for seg sjølv.

– Både far min og bestefar min dreiv for seg sjølv, eg hadde nok litt gründerblod i årene, seier Finn om årsaka til at han hoppa av og blei leverandør til, blant anna, sin tidlegare arbeidsgjevar.

Han eig i dag selskapet åleine, og leiger bygget hos Rolf Haugland, som pensjonerte seg for 6-7- år sidan.

Hydrawinch (seinare Rolls-Royce), Bergen Engines AS (eigd av Rolls-Royce i dag) og Frank Mohn var blant dei første kundane. Den største marknaden er i dag subsea og shipping, delar til blant anna motorar, pumper, gir og - styremaskiner.

Frå 2500 til 10.000 kvadratmeter

Os Maskinering flytta frå Hegglandsdalen til Industrivegen i 1991 og utvida fleire gongar, seinast i 2006. I dag har dei produksjon, lager og kontor på til saman 2500 kvadratmeter.

Sonen Jan kom tilbake frå studier og gjekk inn som dagleg leiar i 2008.

– Kapasiteten vår er no ganske sprengt både i produksjon og lager, så vi har vurdert nye fasilitetar ei stund, fortel Jan.

– Vi kjem til å flytta alt til Rolls-Royce-fabrikken, som samla sett er på rundt 10.000 kvadratmeter, men det kjem til å ta litt tid, truleg to-tre år.

– Eit stort steg

Då det blei kjent at det var fare for at kunden frå Hagavik hadde planar om flytting passa han på å halda kontakten, både for å visa interesse for å halda fram som leverandør, og for å sjå om Os Maskinering kunne overta det av produksjonen som eventuelt blei fasa ut.

Resultatet blei meir omfattande enn først venta.

– Det er klart det er eit stort steg, og med dei bransjane vi opererer i så får vi nok eit par litt tøffe år framover, seier Jan.

Men både han og faren gler seg over løysinga dei fekk til saman med Rolls-Royce, ikkje minst på vegne av dei tilsette.

– Det blir kjekt å koma tilbake der eg starta. Fleire av dei som var kollegaene mine på 70-talet jobbar der framleis, seier Finn Mo.

 

 

 

Fleire saker