Klipte piggtråden

Bildeserie:

Full skjerm

1 av 7

I samband med Osmessa og Nore Neset dagane i helga var det duka for opninga av Osbygda sin tredje musikkbinge. Etter ein lang prosess, som starta for 1,5 år sidan, har no musikkglade unge ein egen plass å vera.

– Eg er kjempenøgd! seier Susan Askvik frå Nore Neset Grendalag, som fekk æra av å klippa over piggtråden og erklæra musikkbinga for opna.

Ho fortel at grunnen til at ho ønskte ein musikkbinge på Nore Neset var alle dei flinke og musikalske ungdomane ho har blitt kjent med.

– Ikkje alle liker fotball eller annan sport og no har dei fått eit alternativ.

Susan håper bingen vil bli brukt heile tida av alle som har lyst.

Fekk intimkonsert

– Det er Os Rockeklubb som skal drifta bingen, som blir utstyrt med ein kodelås som vil bli utdelt til dei som vil bruka den.

På opninga var det tid for ein liten intimkonsert med tre ulike lokale artistar.

Det unge bandet Granateple, som består av fem 8. klassingar frå Nore Neset, var først ut med låta "Love me again" av John Newman.

– Det er gøy og veldig tøft at vi har fått oss musikkbinge, synest dei.

Hans Marius Johnsen hadde med seg Kjetil Osablod Grønvigh på trommer og Jone Kuven på bass og "funka" opp stemninga med Stevie Wonders "Superstition".

– Musikkbingen har betydd alt

Siste artist var ein som verkeleg veit kva ein musikkbinge kan ha å seia for ungdomen. Fredrik Dahle Kristiansen, som no ventar på sin tur i semifinalane i Idol, starta å spela i bingen på Søfteland.

– Det har betydd alt for meg, seier han.

– Eg song ikkje foran andre, og i bingen hadde eg ein plass aleine der eg kunne utfalda meg.

Fredrik speler definitivt ikkje berre for seg sjølv lenger og publikum på Nore Neset fekk høyra hans eigenkomponerte song framført for første gong.

Under opninga drog Grønvigh fram Fredrik som eit kroneksempel på kva ein slik binge kan få fram.

– Eg har sett kva som er mogleg og eg håper mange får stor glede av denne musikkbingen framover.