Knekte nøttene
Oseana er klare for direkteoverføring av Nøtteknekkeren frå Operaen i Oslo. - Alt fungerte perfekt, smiler teknisk sjef Kjetil Moberg.
Laurdag 22. desember overfører Oseana årets tradisjonsrike juleforestilling "Nøtteknekkeren" direkte frå Den Norsk Opera og Ballett i Oslo.
- Dette er noko arrangementssjef Berit Steen har drøymd om heilt sida ho starta, fortalde direktør Kim Kristoffersen då han sleppte nyhenda tidlegare i månaden.
Fungerte perfekt
Midtsiden var med då teknisk sjef Kjetil Moberg testa systemet.
Alt fungerte som det skulle.
- Vi trudde vi måtte leiga ein betre prosjektor og kanskje oppgradere datalinene inn til huset, forklarte Moberg.
Det trengde han ikkje.
Henta del frå heimekinoanlegg
Ved å bruka HDMI-inngangen på prosjektoren i taket blei bildet perfekt.
Når driftsteknikar Espen Hjertaas i tillegg henta delar av eit gamalt heimekinoanlegg han hadde ståande blei òg lyden perfekt.
- Eg er glad eg har med meg Espen, for dette med lyd kan han.
Måtte kjøpa Mac
Einaste investeringa dei trengde å gjera var å gå til innkjøp av ein Mac mini for å kjøra den naudsynte programvara.
- No skal alt vera klart til overføringa, så no er det berre for publikum å kjøpa billettar, avsluttar ein entusiastisk Kjetil Moberg.
Overføringa startar klokka 15, der publikum får lov til å vera med bak scenen og høyra eit direkteintervju med ballettsjef Ingrid Lorentzen før framsyninga tek til.