– Knuste i kaien

Laurdag klokka 12.43 fekk politiet melding om båtulykke på Malkenes på Tysnes.

– Hurtigbåten ”Rygerfonn”, med 29 passasjerar, hadde ein kraftig samanstøyt med kaien. Ambulanse, brannvesen og politi rykte ut, fortel operasjonsleiar Erik Hole i Hordaland politidistrikt.

Rygerfonn, som Rødne kalla Hardangerfjordekspressen, går i rute mellom Bergen og Rosendal, og er blant anna innom Os på ruta.

Blant dei 29 passasjerane i dag var andrelaget til Os Turn fotball, som var på veg til Rosendal for å spela kamp.

– Flaksa tre meter

– Vi sat og spelte kort, og la merke til at båten hadde stor fart inn mot lan. Men vi rekna med at den hadde kontroll, seier angrepsspelar Ramo Racic.

– Men så sa det pang! Ein av dei tilsette sto med døra open, ei kvinne i nærleiken flaksa sikkert tre meter ut gjennom døra før ho landa.

– Men oss spelarane går det bra med.

Politiet seier alle kom uskadd frå ulykka bortsett frå ein person som var sjokkskada.

Reservebåt og utsett kamp

Rederiet Rødne har skaffa reservebåt og Os-spelarane og resten av passasjerane kom seg til Rosendal.

– Men kampen måtte utsetjast frå klokka 14 og cirka ein time, seier Racic.

Det er førebels uvisst kva som er årsaka til samanstøyten.