Kø til Moberg og utrykking til ferjekaien

I 14.30-tida fredag byrja ferjekøen å bygga seg opp forbi Halhjem Kjøkken. Pinsetrafikk og handballcup på Stord gjer at fredag i inngangen til pinse kvart år skaper lang kø på E39.

Klokka 17.45 gjekk køen heilt til Liafjellstunnelen. I periodar var det òg lang kø inn mot flaskehalsen, rundkøyringa ved Industrivegen, der bilar sto forbi Joker-butikken til Stilvoll på Søfteland.

– Køen var ikkje så lang då vi sendte ein patrulje til Halhjem, fortel operasjoneleiar i Vest politidistrikt, Kjersti Eidsnes.

Klokka 14.48 og 14.51 kom det meldingar frå trafikantar som fortalte at andre bilistar tok på nødblink og køyrde på utsida av køen. Dette var truleg bilistar som ikkje skulle med ferja, som ville forbi køen og inn i eit bustadområde. Politiet hadde på førehand åtvara mot dette.

– Ein patrulje blei sendt ut og køyrde på utsida av køen til Halhjem. På ferjekaien hadde mannskapa god kontroll, dei tok flest mogleg bilar ned på kaien for billettering og lånte ei fil av sambandet mot Våge for å få betre plass.

– Det var heller ikkje fleire forsøk på å køyra på utsida av køen mens politiet var på staden, og patruljen returnerte i 16-tida.

Mista skiltet sitt

Fredag fekk politiet melding frå ei dame som hadde mista det eine av kjenneteikna på bilen sin.

Det er uvisst om dette er mista eller stole. Kvinna mista skiltet då bilen sto parkert i Bjørnavegen.

Trafikkontroll i natt og i morgontimane

Det har vore ein elles roleg start på pinsen i Os.

Klokka 04.40 hadde politiet trafikkontroll i begge retningar på E39 på Søfteland, utan at dei fann noko å reagera på.

Klokka 9.30 laurdag morgon avslutta dei ein promillekontroll på Ulvenvegen, også den utan at nokon blei tatt.