Kollisjon skapte kork

Laurdag i 16.15-tida var det ein frontkollisjon på Gåssandvegen. Politi og to ambulansar rykte ut til staden.

Ingen blei skadd i samanstøyten, men føraren av den eine bilen var i sjokk og blei tatt hand om av ambulansepersonell.

I den eine bilen var det tre passasjerar, to av dei ungar.

Trafikken var blokkert i over ein time. På innsida av ulykkesstaden sto det 10-15 bilar i kø, blant anna eit heilt jaktlag, som venta på å koma seg heim.

Politiet tok promilletest av begge førarane. Ingen av dei blåste raudt. Det er 80-sone på staden, men vegen er smal og på ulykkesstaden er den uoversikteleg.