Kom heim med nytt flaggskip

I 2012 kjøpte Samba AS sin andre arbeidsbåt, MS «Molly». I går fekk MS «Samba» og MS «Molly» selskap av rederiet sitt første nybygg, MS «Fox Fighter».

– Molly går på kontrakt i oppdrettsbransjen frå august så vi trengte ein erstattar, seier reiar Bjørn Anders Brimsholm, som eig Samba AS saman med fetteren Jan Erling Røttingen.

– Det gjekk fort frå vi signerte kontrakt 8. mai til vi fekk levert båten på dagen 12. juni som avtalt. 

 Samba AS har fleire faste avtalar, faste kundar og rammeavtalar, og opererer både i oppdrettsbransjen og privatmarknaden, men mest innan offshore, med sleping, ankerhandtering og transport.

Brukte tre dagar på heimreisa

Laurdag reiste han saman med pappa Anders Brimsholm og tilsette og innleigd mannskap; Eirik Haugland, Andreas Amundsen og John Kristian Bakke.

I 14-tida i går kom dei til Øyane og Vedholmen Landhandel, der dei fekk vist fram nybygget til ein god gjeng med skodelystne sambygdingar.

– Det var nordavind heile vegen, så vi brukte litt tid. Gode bølgjer var det òg, så vi fekk testa båten skikkeleg, og vi blei positivt overraska. 

Stor og sterk

MS «Fox Fighter» er 27,27 meter lang og 12,45 meter brei. Til samanlikning er Molly 24 x 9 meter.

Nybygget har 2 x 600 hk og ein kran på 230 tonnmeter, mot Molly sine 2 x 500 hk og kran på 140 tm.

Fox Fighter har kran med rekkevidde på 16,5 meter. Den kan løfta 10 tonn på strak arm og nærmare 30 tonn lengst inne.

Den har ankerhandteringsvinsj som løftar 100 tonn og slepevinsj på 50 tonn. Slepevinsjen blir ettermontert i oktober i år.

Fox Fighter har fem lugarar, to av dei er doble, vaskerom med vaskemaskin og tørketrommel og ei god bysse.

Rederiet sin første båt, MS Samba, er med sine 31 x 9,6 meter framleis lengste båt. Den har motorstyrke på 600 hk og krane på 140 tm, og er einaste med kjørerampe og dekksplass til for eksempel betongbil.

10.000 tilsette – éin eigar

Bjørn Anders og Jan Erling sjekka først bruktmarknaden då dei leita etter sin tredje båt.

– Der var det få båtar, og dei som kunne vore aktuelle var i ein prisklasse som nesten tilsvarte ny båt.

Valet falt på ein Multi Cat 2720 frå nederlanske Hardinxveld, det eldste av Damen Shipyard sine mange verft.

– Det er litt av eit selskap, ei familiebedrift med nærmare 10.000 tilsette, der alt er eigd av éin mann. Vi fekk helsa på eigaren sjølv og det blei ein staseleg dåp ved levering 12. juni. 

– Hardinx produserer desse katamaranen i stock, altså på spekulasjon. Vi var nede i januar og såg på bygget, då var dei i gang med isolering av båten. Då vi bestilte i mai fekk vi inn våre ønskje om utstyr og innhald, og så gjekk det slag i slag fram til presis levering.

– Det er fleire årsaker til at vi valte Damen, to av dei er at dei kan levera raskt og at dei har godt omdømme.

– Vi har hatt god vekst dei siste åra, men om vi ein dag må kvitta oss med ein av båtane vil eit nybygg frå Damen vera lettare å selja i Noreg eller andre stadar i Europa enn mykje anna, seier Bjørn Anders Brimsholm.