Køyrde ni døgn utan nok kvile

Statens vegvesen hadde laurdag streifkontroll fleire stadar i Bergensområdet og på Os.

Dei starta dagen på Dokken og ved Lagunen. Deretter flytta dei seg vidare til Halhjem kai, før dagen vart avslutta på Bergen trafikkstasjon.

Knut Sylta i Statens vegvesen fortel at totalt 22 tunge og 8 lette køyretøy vart kontrollerte. Hovudfokus var kontroll av vinterutrustning (dekk og kjetting) og køyre- og kviletid.

Køyreforbod på Halhjem

- På Halhjem stoppa kontrollørane eit biltransportvogntog for kontroll av køyre og kviletid, fortel Sylta.

– Her avdekka vi brot på reglane om vekekvile. Sjåføren var på kontrolltidspunktet i gang med sitt niande køyredøgn sidan førre vekekvile. Ei slik kvile skal startast seinast seks døgn etter at førre vekekvile vart avslutta.

Sylta fortel at det vart gitt køyreforbod fram til føraren har fått avvikla ei godkjend vekekvile på minimum 24 timar. Føraren vart også meld for forholdet.

– Det aktuelle transportfirmaet blir også rapportert inn til foretakskontrollen. Å overholda vekekvila er svært viktig både med tanke på trafikksikkerheit, men også sjåførvelferda, avsluttar Sylta.