Søvikåsen tidlegare i vinter. I går var det ikkje vinterføre som var problemet, men lengda på køyretøyet. (Foto: KVB)

Køyrde seg fast i Søvikåsen - fekk 5500 kroner i bot

Brukte ein time på å bli dirigert tilbake på Ole Bulls veg.

Av: Kjetil Vasby Bruarøy

I går var det nok ein lastebilsjåfør som oversåg skiltet på Ole Bulls veg som seier maks 3 tonn og 8 meter lengde.

Heller ikkje denne bilen klarte å gjennomføra turen.

– Vi fekk melding klokka 13.26 og rykte ut. Etter ein time hadde den blitt dirigert tilbake, fortel lensmann Oddbjørn Dyrdal.

Det var ein norsk sjåfør denne gang, ein ung bilførar som fekk ros frå politiet på staden for kor god kontroll han hadde på køyretøyet.

Han fekk likevel eit forelegg på 5500 kroner for å ha trassa forbodsskiltet.

Vil sjå på skiltinga

Bilførar forklarte at han køyrde den ruta GPS-en sa var kortast, og at han la merke til skiltet litt for seint.

– Politiet på staden var einig i at skiltet kunne stått noko tidlegare. Vi vil derfor sjå nærmare på saka, og sjå om det er mogleg å gi eit litt tydelegare varsel.

– Samtidig ser vi frå fleire plassar at lastebilsjåførar har ein tendens til å velja kortaste veg når dei køyrer på GPS på stadar dei ikkje har vore før, så det spørs om betre skilting er nok.

 

Fleire saker