Det var dekka til 50 i andre etasje i den nye fabrikken, der kantina kjem når bygget står ferdig til sommaren. (Foto: Kjetil Vasby Bruarøy)
Det var dekka til 50 i andre etasje i den nye fabrikken, der kantina kjem når bygget står ferdig til sommaren. (Foto: Kjetil Vasby Bruarøy)

Kranselag på Inka-fabrikken

5.500 kvm reiser seg: Effektive entreprenørar fekk servering og kortreist musikk.

Kjetil Vasby Bruarøy
06. desember 2019 - 11:31

I mai blei det kjent at Karsten «Kakki» Austevoll og Inka AS har fått ein kontrakt verdt over ein milliard kroner og bygger ny fabrikk på 5.500 kvadratmeter. Denne får kapasitet på 40 tonn per skift, altså 80 tonn per dag med ferdigforedla fisk.

I sommar starta bygginga, på seinsommaren var ny fabrikksjef på plass og i går blei det halde kranselag for Helgesen Tekniske Bygg (HTB) med underleverandørar. Også storkunden Seaborn, Os-ordførar Terje Søviknes, assisterande kommunedirektør Nils-Petter Borge, næringssjef Elin Bryn Thorsen og Sparebanken Vest deltok på kranslelaget.

– Det har vore heilt fantastisk å følgja med på byggeprosessen, som har gått på skjener! Til våren kjem produksjonslinjene for montering, og bygget er i rute, seier Kakki.

Overraska av Kongshaug-elevar:
(Artikkelen held fram under videoen) 

Inka sin prosjektleiar, Kjetil Løvaas, ønskte velkomen og fortalte om korleis han kunne sjå sju semitrailerar frå kontorvindauget, og ein time seinare var alle vekke.

– Det er tydeleg at HTB har orden på logistikken. Vi ser dessutan at dei har ein ryddig og fin anleggsplass og ein upåklageleg HMS, seier Løvaas.  

Blant underleverandørane er Mjelstad og Stokke Rørleggerforretning AS, også dei frå Osterøy, og Robert Kaastad Entreprenørservice og Multi Entreprenør, begge frå Os.

– Vi har på det meste hatt fire mann i sving her, men er ferdig i morgon, med unntak av nokre mindre oppdrag som kjem seinare, seier Atle Døsen frå Multi Entreprenør.

– Det er første gong vi jobbar for HTB, og vi gjer det gjerne igjen.

Prosjektleiar Tonny Hjertås og bas Torbjørn Småland frå HTB fekk rikeleg med ros. Sjølv er dei glade for oppdraget, og for at transporten på den stadvis smale Lepsøyvegen har gått fint. Det einaste dei måtte frakta sjøvegen var mobilkranen som løfta elementa på plass, den var for tung for Lepsøybrua.

– Vi har stort sett 3-4 mann i sving her, og alt har gått fint til no. Det er eit gøy prosjekt å vera med på!

Høgt tempo på dagens fabrikk

I dag produserer Inka 6000 tonn foredla fiskeprodukt i året, rundt 40 variantar av 15 ulike produkt. I fjor blei det omsetnadsrekord med 97,3 millionar kroner. Ny kontrakt sikrar minst 13.000 tonn i året, noko som tilsvarar 250-300 millionar per år i 4 + 4 år.

Til saman har dei to fabrikkane ein kapasitet på 18.000 tonn per år, på eitt skift, men begge kan drivast av fleire skift ved behov. Den nye fabrikken kjem i tillegg til dagens fabrikk, som òg er moderne utrusta, og som blir oppgradert med ny vakuumpakkemaskin i juleferien.

På innsio: INKA (videoreportasje, 2016)

– Fram til jul produserer vi maksimalt av det vi klarer, og køyrer to skift. Marknaden er svært god, det har vore ein travel haust, fortel fabrikksjef Øyvind Magnussen.  

Den nye fabrikken får det siste nye innan produksjonsteknologi frå den leiande leverandøren Marel, og blir den mest avanserte foredlingsfabrikken i Europa. Over nyttår skal tilsette hos Inka til Marel sitt «treningssenter» i Danmark, på opplæring på dei nye produksjonslinjene.

– Vi har hatt nokre interne opprykk, og har auka bemanninga med fleire fast tilsette og fleire innleigde. Vi merker god interesse for å jobba her, fortel Magnussen.

Karsten Austevoll gler seg òg over svært positive tilbakemeldingar, både satsinga, og på korleis den store fabrikken ligg i terrenget.

– Med vilje og evne

Det var dekka til 50 gjestar i andre høgda i den nye fabrikken, i same hjørne som kantina kjem, med fin utsikt over Gjelevika.

– Innanfor her kjem døgnope treningsrom for tilsette. I motståande hjørne kjem kontorfløy og midt i etasjen er det opning. Der kjem eit visingsrom som gjestar og andre kan sjå heile produksjonen i førsteetasjen utan å kle seg om og gå gjennom sluser, forklarte Løvås, som seinare tok alle med på omvising.

Søviknes sa han gledde seg over å sjå at det er verksemder i Os med evne og vilje til å satsa stort og skapa nye arbeidsplassar.

– Vi politikarar har lett for å vera opptatt av nyetableringar og dialog med store aktørar som vil til bygda, men de som er her frå før er grunnstamma vår. Då er det ekstra kjekt når det går godt, og når det blir rom for store utvidingar.

Vin og song

Etter å ha fått blomar av Søviknes var det Kakki sin tur til å dela ut blomar. Men før talen til både ordførar og eigar fekk kranselaget ei musikalsk overrasking.

Vi høyrde dei før vi såg dei, dei fem elevane Gunvor Mathilde Hugdal, Madeleine Buer, Elise Wanvik, Maria Leonora Lilleås og Liv Margrethe Andersen frå Kongshaug Musikkgymnas som kom syngande opp trappa.

Kakki takka ikkje berre med blomar, det er tydeleg at han set pris på musikkgymnaset på Lepsøy, som blant anna bidrar under 17. maifeiringa i Øyane.

– De er flinke å samla inn pengar til gode formål. Sist var det til Mongolia, og eg vil gjerne støtta denne innsatsen til Kongshaug, sa Austevoll og gav ein sjekk på 10.000 kroner.

Så gav Austevoll merksemd til Helgesen Tekniske Bygg og delte ut vin til alle dei involverte handverkarane. Kranselaget blei runda av med omvising i fabrikken.

Les meir om

Næringsliv Industri