KREAM vurderer kontrakttilbod

I mars fortalte vi om brørne Daniel og Markus Slettebakken, dei tidlegare vassjetkjørarane, sin nye hobby. Remix-duoen KREAM fekk i vinter internasjonal merksemd og blei blant anna kontakta av Tove Lo for å laga offisiell remix av ein av den svenske stjerna sine låtar.

– Eg blei litt overraska då Taio Cruz tok kontakt, ikkje minst det at han ringte sjølv, seier Daniel.

Singer-songwriter, rappar og produsent Cruz har blant anna vore co-skribent med David Guetta og Jennifer Lopez. No ville den britiske kjendisen ha remix frå brørne frå Askvik i Os.

«It's a throwback to the 80s, but with modern production,» sa Cruz då Billboard.com omtalte remixen frå osingane.

Også Adam Lambert, som kom på 2. plass i American Idol i 2009, har kontakta KREAM for remix.

Spelte med Matoma i Tønsberg

Parallelt med interesse frå fleire store namn i og utanfrå Europa har det byrja å dukka opp klubbar og festivalar som vil ha KREAM på scenen.

– For cirka ein månad sidan signerte vi avtale med Atomic Soul, som no tar all booking for oss. Men vi får også førespurnadar frå andre stadar, blant anna New York, og ser no etter eit bookingbyrå for Europa og eit for USA.

Tysdag hadde KREAM sin første store gig. Då var dei eitt av fire namn på plakaten på eit utselt afterbeach party i Foynhagen i Tønsberg.

– Vi gjekk på scenen etter Coucheron og Sonny Alven, rett før Matoma. Stemninga var topp, det var også dei andre artistane og festen vi hadde saman utover kvelden.

No står nye spelejobbar for tur, i Fredrikstad 1. august, på Øyafestivalen afterparty 14. august og på fadderveka til BI i Trondheim 15. august.

Kombinasjon og krossveg

Ved sidan av offisielle remix har KREAM fått mange streams av uoffisiell musikk lasta opp på Soungcloud. KREAM sin remix av Major Lazor-låta «Lean on» er den mest spelte remixen av låta, 4,5 millionar gongar er den spelt til no.

I desse dagar sit brørne heime hos mor og far i Askvik og vurderer to gode tilbod mot kvarandre, frå to store, kjente label.

– Eg søkjer ikkje jobb innan økonomi no, det skjer for mykje innan musikken, vi smir mens det er varmt, seier storebror Daniel.

I juni blei han uteksaminert ved Copenhagen Business School. No har han flytta heim frå Danmark og vil sjå etter leilegheit i Bergen.

Markus er ferdig med første året som musikkstudent ved Universitetet i Agder, og held fram som student i Kristiansand.

– Studiene let seg fint kombinera med musikken eg driv med på fritida. Skulen støttar det eg jobbar med og i fleire samanhengar overlappar dei kvarandre, seier Markus.

Ferie blir det uansett lite av for dei to.

– Vi har originale låtar vi jobbar med, både for oss sjølv og andre, og vi har eit val å ta, når det kjem til kontrakt. Det blir hektisk fram mot spelejobbane i august. Sånn det ser ut no blir det travelt etterpå òg, seier Markus og Daniel.