Kva med nabokommunane?

Tysdag blei ordførarane i Os, Askøy, Fjell, Sund og Øygarden saman med byråd for kultur, idrett og kyrkje i Bergen einige om eit spleiselag for å finansiera den lovpålagte ordninga med smådyrvakt i dei aktuelle kommunane, ei ordning Staten fram til midten av 2014 finansierte. Osterøy var også representert i møtet, men kjører sitt eige opplegg.

– Samla sett treng vi 900.000 kroner for å finansiera tenesta ved dei ni klinikkane. Det blir lagt opp til ein grunnpott på 50.000 kroner per kommune og eit tillegg justert ut frå innbyggartal. For Os kommune reknar eg med prisen blir 80.000 til 100.000 kroner i året, seier ordførar Terje Søviknes (Frp).

Endeleg avgjerd blir fatta i formannskapet i morgon. Bergen kommune forskotterar ordninga ut oktober.

0 til 15 i døgnet

Veterinær Eva-Kristin Lunde ved Osøyro Dyreklinikk er glad for at kommunane har vore raske og positive i saka.

– Eg vil takka publikum, dyreeigarar og andre som har støtta saka. Eg trur at det store og tydelege engasjementet har vore avgjerande for at dette spleiselaget kom på plass så kjapt, seier ho.

Typiskebrukarar av smådyrvakta er folk som har dyr med akutte og livstrugande problem, sjukdomar eller skader, for eksempel etter ei trafikkulykke der dyr er ramma.

– Å bruka smådyrvakta kostar ekstra pengar, å driva døgnvakt er endå dyrare. Nokre netter og helger er det heilt stille, andre er det svært hektisk. Vi kan ha frå null til over femten konsultasjonar på éi vakt.

Støtta dei får er viktig, men hovudpotten er det dyreeigaren som tar.

– Vi må ha veterinær og dyrepleiar på vakt og ein veterinær i tillegg på bakvakt. Støtta utgjer knappe 100 kroner i timen, men vi er glad for at kommunane er med og tar kostnaden.

Betaler vi for alle?

Osterøy klarer seg sjølv og seks andre kommunar spleisar. Kva med dei andre kommunane i fylket? Er det 7 kommunar som tar rekninga for 33 i Hordaland?

– Nei. Dei andre skal ha eigne ordningar. Fylket er delt inn i distrikt og Osøyro Dyreklinikk er ein av ni klinikkar i distriktet vårt, seier Søviknes.

Lunde seier at det ikkje er uvanleg at dyreeigarar reiser 2-3 timar med bil for å få hjelp, både frå nabokommunar og frå andre fylke.

– Men det er ikkje noko problem. Støtta vi får er fast, ikkje avhengig av talet på konsultasjonar, så det blir ikkje noko meirkostnad for kommunen om vi også hjelper andre.

– Om du kjem frå Fusa er det med andre ord ikkje noko i vegen for å ta katten din med til Os?

– Nei, det er det ikkje. Fleire mindre stadar har gjerne ein veterinær på vakt, men dei har ikkje ein heil klinikk og må gjerne senda vidare dyr som treng meire omfattande operasjon.

Dei involverte klinikkane

– Vi er svært glade for at Bergen kommune og dei fem omegnskommunane er blitt einige om å vidareføre vaktordninga, seierLisbeth Holtet på vegn av dei ni klinikkane.

– Vaktordninga blir også til nytte for hundar i teneste for politi, tollvesen, forsvar, lavinehundar og førarhunder for blinde.

Desse dyreklinikkane er med i vaktordninga:
1) Askøy Dyreklinikk
2) Bergen Smådyrklinikk
3) Dyreklinikken Bergen Vest as
4) Gården Dyreklinikk / Mastervet
5) Myrbø Dyreklinikk
6) Os Dyreklinikk
7) PetVett Dyreklinikk
8) Stend Dyreklinikk
9) Tertnes Dyreklinikk

Dei har felles vakttelefon med nummer 820 90 060.