Kva skjer med bowlingklubben?

I 2011 blei det stopp i drifta av bowlingen då Os Filmsenter la ned. Bowlingen blei driven vidare av klubben fram til ny leigetakar var på plass seint på hausten same år.

Men etter nærmare 13 år med bowling i Os er det no definitivt over. I det 1050 kvadratmeter store lokalet skal det no byggast Energi Treningssenter og Vitusapotek.

– I dag skal siste rest av banane vera demontert og frakta vekk, fortel Tony Wold, formann i Os Bowlingklubb.

– Ein reknar éin million kroner i pris per bane, men montering utgjer ein stor del av summen. Dei åtte banane i Os er gitt vekk til Askøy Bowlingsenter.

– Alle synest det er gøy

Os Filmsenter, som dreiv med videoutleige i Os sentrum frå 1984, utvida med bowling då dei hausten 2001 flytta til Irisgården.

Våren 2002 blei Os Bowlingklubb starta.

– Alle synest det er gøy med bowling, men for dei fleste blir det ein og annan gong, ikkje noko dei driv med fast.

– Men vi har på det meste hatt nærmare 30 aktive utøvarar i klubben. I tillegg har vi hatt Os LHL og bedriftsserie.

Wold trur likevel det er nokre andre som kjem til å sakna bowlingbanane like mykje.

– Bursdagsfeiring med bowling har vore veldig populært. Ungar og småbarnsforeldre kjem nok til å merka at banane er vekke.

Klubben held fram, men ikkje i Os

Os Bowlingklubb har dei siste månadane visst kva veg det gjekk med bowlingen. Drivar og leigetakar Tore André Sagstad fann det ikkje lønsamt og var i dialog med huseigar om å bli fristilt frå kontrakten.

No vil han heller konsentrera seg om Solsiden som restaurant, fotballpub og pianobar i nabolokalet.

– Vi har derfor drøya med å halda årsmøte i klubben, no blir årsmøtet over ferien.

– Eg kjem nok til å trekka meg som formann, men det er ein gjeng som vil halda liv i klubben vidare og flytta spelinga til Sandsli.

– Har klubben vurdert å leiga anna lokale i Os og overta banane?

– Nei. Du treng stort lokale og sjølve monteringa er nok dyr for ein liten klubb.

– Sjølv jobbar eg på Kokstad, så eg kjem nok til å svinga innom og spela litt på veg heim frå jobb av og til. Men etter mange år med angasjement både for klubben, på banane og med teknisk vedlikehald vil eg ikkje ha noko rolle i klubben lenger, seier Tony Wold.

Nytt liv i lokalet

Energi Treningssenter leiger 817 kvadratmeter av lokalet og får ny inngang nær Solsiden når dei opnar i september.

Vitusapotek, som skal opna i november, leiger 242 kvadratmeter og skal bruka inngangen som var brukt av bowling og videokiosk når dei opnar i november.