Kva ville du gjort?
Landbrukskontoret i Os og Fusa åtvarar mot aktiv hjort og fare for påkjørsle. Samtidig fortel dei kva du skal gjera om uhellet er ute.
– Vårtrekket har byrja, hjorten er veldig aktiv på denne tida og det er større sjanse for å møta hjort i vegbanen, seier Johan Bergerud frå Fusa kommune og Os og Fusa landbrukskontor.
Han seier at mange gjer det som er rett etter påkjørsle av hjort, men ikkje alle.
– Det kan føra til unødige lidingar for hjorten.
Ofte blir ikkje hjorten liggande død på staden, men stikk til skogs, også om den er stygt skadd.
Ring politiet
– For det første er det viktig at folk veit kvar dei skal ringa, at ikkje dei kastar vekk tid på å ringa for eksempel kameratar som går på jakt, eller liknande. Vi har hatt nokre eksempel på det.
Kjører du på ein hjort skal du ringa politiet på 02800.
– Politiet tar så kontakt med kvalifisert ettersøkspersonell.
Merk staden
Om hjorten stikk frå staden etter samanstøyten så prøv å merka deg staden hjorten spring ut i grøfta.
– Det er til stor hjelp om folk merker seg staden så nøye som mogleg og markerer kvar dette er, for eksempel med ein plastpose eller eit plagg.
– Då er det lettare for hundar å starta eit eventuelt søk, ettersøkspersonellet sparer mykje tid og ein skadd hjort får færre vonde minutt før avliving.