– Kvart sekund kan vera avgjerande

Søndag 1. desember er det ikkje berre tid for å fyra i første advendtslys, det er inngangen på årets to mest brannfarlege månadar, og datoen 1. desember er «røykvarslardagen».

– Det er tid for å skifta batteri i røykvarslarane dine, og å testa dei. Sjekk at alle høyrer varslaren godt frå eige soverom, også med døra igjen, seier branninspektør Martin Østgulen Svendsen frå Os brann- og redningsvesen.

I 2018 rykte brannvesenet i Hordaland ut til 69 bustadbrannar som starta mellom klokka 23 og 07 om morgonen.

– Når det brenn kan kvart sekund vera avgjerande. Ein overlever ikkje lenge i ein bustad fylt med røyk, og når du søv er du heilt avhengig av varsling for å ha sjanse til å redda deg sjølv og andre, seier feiarmeister i Os, Jan Olav Birkeland.

Desember og januar er mest brannfarlege. Vi fyrer meir i omn og peis, bruker meir elektrisitet, tenner fleire lys og drikk meir alkohol.

Kjem på besøk i neste veke

I tillegg til å minna folk på å skifta batteri, legg Os brann- og redningsteneste opp til ei aktiv forebyggande veke etter 1. desember.

Både tysdag og torsdag vil brannvesenet gå saman med Røde Kors ut i ulike nabolag for å sjekka branntryggleiken hos innbyggarane.

Onsdag står brannvesenet på AMFI Os for å dela ut batteri til røykvarslarar saman med informasjon om branntryggleik, måndag står dei på Fjord'n Senter.

På roykvarslerdagen.no finn du nyttig informasjon om tiltak som betrar branntryggleiken heime hos deg.