Kven er Os beste bakar?
Det lurar sentrumsforeninga på. I samband med Bondens dag arrangerar dei difor bakekonkurranse.
Os sentrum arrangerar laurdag 25. august den tradisjonelle Bondens dag kor sentrum fyllast opp av liv og røre, levande dyr og gode tilbod.
- I år har vi lyst til å gjera ein ting til.
- Vi byrja nemleg å diskutere kakebaking då det slo oss at vi ville invitera osingane til bakekonkurranse, smilar ein kakeglad leiar i sentrumforeninga.
Olympisk pall
I desse olympiske tider lovar Geir Amundsen skikkeleg premiering og konkurranse.
- Vi premierar, som i OL, med første, andre og tredje plass.
- Alle som har lyst til å vera med baker bidraga sine heime og leverar dei på torget før klokka 12 på Bondens dag.
Kake og kaffi til alle
Om du bakar gjærbakst eller anna bakst bryr ikkje Amundsen seg om. Han gler seg berre til å smaka.
- Ein jury, som vi førebels vel å halde hemmeleg så ingen smørar dei, vil stå for kåringa.
- Etter at vinnarane er kåra blir det kakefest på torget der alle som vil får smaka på bidrag, fortel Amundsen.
No håpar han berre osingane tek utfordringa slik at det blir mykje å smaka på. Sjølv lover han å stille med kaffi til kosen.