Kvinne fekk bank av mann
Politiet har vore ute på fire tilfelle av husbråk i vinterferien. I går enda det på sjukehus for ei kvinne, på legevakt for ein bror.
Onsdag i 12-tida fekk politiet melding om familievald i ein bustad i Os.
– Ei kvinne hadde fått bank av sambuaren sin. Kvinna blei frakta til sjukehus, mannen blei tatt med til arresten, fortel politioverbetjent Terje Sperrevik.
Kvinna blei lagt inn med beinbrot. Kva bein kvinna hadde brote, og kva andre skadar ho har, vil ikkje Sperrevik ut med.
Barnevernet blei også kopla inn.
– Vi har vore ute på fire meldingar om husbråk denne veka. Dette er den mest alvorlege av dei.
Brør i blodig slåsskamp
I 21.30-tida onsdag kom ny melding om husbråk.
– To brør hadde byrja å slåss, fortel Sperrevik.
Fornærma blei tatt med til legevakt med kutt. Dei to involverte er i 20-åra.
Berserk på ungdomssenter
Onsdag i 18-tida var det også bråk i Os. Då var det ein gut på eit ungdomssenter som blei vanskeleg å ta hand om.
– Han var heilt krakilsk og knuste inventaret på senteret.
Etter at det roa seg, og han hadde fått ein prat med politiet, blei ungdomen dimittert.