Kvinne frå Os vann 2 millionar på Extra

Irene Løvoll var og handla med faren sin på Lagunen, då Norsk Tipping i kveld slo på tråden.

– Eg har aldri sett ei Extra-trekning før, og visste ikkje korleis den fungerer. Men det var veldig kjekt å ha dei på tråden mens dei trekte tala, seier Irene til Midtsiden.

Ho fekk treff på dei tre første tala, og klatra frå rett over 215.000 kroner til 538.000 og 962.000 kroner.

Så blei det to bom før det siste talet tikka inn og førstepremien på beint 2 millionar kroner var i boks.

– Det er ganske uverkeleg, nesten så eg trur at nokon tullar med meg. Men eg har snakka med dei til saman tre gongar i kveld, så eg veit jo at det er sant.

– Eg har òg fått masse gratulasjonar, også frå folk eg ikkje kjenner. Det er jo fint at folk gler seg på dine vegne, og synest det er stas når nokon vinn store premiar.

– Har du vunne store premiar før?

– Nei, aldri. Eg har ein 5-vekerskupong gåande, og vinn av og til nokre småpremiar på den. Då dei ringte i dag, hadde eg ikkje kupongen med meg, så eg måtte inn på ein butikk og låna penn og papir, så eg kunne skriva ned tala mine før dei heldt fram trekninga.

Tobarnsmora, som er i slutten av 40-åra, held på å pussa opp heime, utan at dette arbeidet skal gjera nokon stor innhogst i pengepremien.

– Vi har allereie bestemt oss for kva vi skal gjera, og det er ikkje noko spesielt gevinsten skal gå til. Eg vil ta imot litt rådgjeving, og så blir det kanskje ein litt finare ferie enn elles.