Asbjørn Forstrønen og Bjørn Eliassen i Lady K under windjammeren laurdag. (Foto: Magne Langåker, fotoml.no)

Lady K tok 3. plass på Stord

Tre båtar frå Os deltok i årets Wärtsilä Windjammer Race 2014. Lady K deltok i doublehanded og gjorde det best av dei tre.

Av: Kjetil Vasby Bruarøy

I helga blei årets seglesesong avslutta med den årelege 16 nm lange regattaen Wärtsilä Windjammer med start og målgang i Leirvik hamn på Stord.

Deltakarane seglar til Stord fredag ettermiddag, seglar regatta laurdag og rundar av sesongen med bankett laurdag kveld.

Lady K med Bjørn Eliassen og Asbjørn Forstrønen, som vann i 2010, stakk i år av med 3. plassen i doublehanded (slått saman med singelhanded til klassen «shorthanded»).

– Det blei ein frisk og fin seglas, og vi kunne fint ha vunne om vi ikkje blei litt lurt av vinden enkelte periodar. Eg trur alle som deltok hadde ein veldig fin dag på sjøen, seier Bjørn Eliassen.

– Vi deltok ikkje i fjor, men har stort sett gjort det ganske bra i windjammeren. No var det godt å koma på pallen igjen, synest han.

Rikeleg med vind

Osingane hadde, som dei fleste av deltakarane, ein ekstra frisk tur ned til Leirvik fredag.

Dei fekk 18-19 m/s vind rett imot i Korsfjorden. Også regattadagen bles det friskt, 8-10 m/s på morgonen og 14-15 m/s ved start.

4. og 5. plass til Marlin og Tina

Alle båtane frå Os gjorde god figur i Sunnhordlandsbassenget.

Tina, tidlegare Tina for II, deltok i den hektiske doublehanded-klassen.

Her hadde Svein Skoglund med seg Ole Morten Lom og dei to tok ein fin femteplass.

Hermod Opstvedt stilte med Marlin og fullt mannskap og tok 4. plass i klassen NOR Rating med spinnaker og med rating t.o.m 0,984.

Les meir og sjå full resultatliste på seilmagasinet.no.

 

Fleire saker