The Lady opnar 60° Nord

Aung San Suu Kyi sin langvarige kamp for demokrati i Myanmar (Burma) blei sundag krona med siger då ho blei vald inn i nasjonalforsamlinga i landet. Partiet hennar «Nasjonalligaen for demokrati» (NLD) har truleg tatt 43 av dei 44 mandata det blei stemt på under suppleringsvalet sundag.

No er det klart at den dramatiserte biografien om Suu Kyi blir opningsfilmen under 60° Nord Os Internationale Filmfestival laurdag 21. april.

- Dette er stort. Frå Scanbox, som har distribusjonen i Noreg, har vi fått lov til å visa filmen ei veke tidlegare enn i resten av landet.

- Dermed får den dagsaktuelle biografien Noregspremiere når den opnar filmfestivalen om tre veker, strålar pressesjef Christoffer Kobbeltvedt.

Filmen hadde verdspremiere under filmfestivalen i Toronto i september.

Takka for filmen

Gjennom stor detaljrikdom fortel regissør Luc Besson historia om Suu Kyi sine stadige tragediar og triumfar og ikkje minst tildelinga av Nobels fredspris.

Filmen er òg ein episk kjærleikshistorie om korleis eit ekstraordinært par og familien deira ofrar si eigen lykke for ein høgre sak.

Til Herald Sun fortalde Besson i november at han hadde korrespondert med Suu Kyi gjennom hemmelege kanalar i fleire månader og at hovudpersonen sjølv hadde mottatt filmen, men at ho ikkje hadde hatt mot til å sjå filmen enno.

Filmen skildrar fleire vanskelege episodar i Suu Kyi sitt liv, blant anna både faren og ektemannen sin død.

Hovudrollane som Suu Kyi og ektemannen Michael Aris blir spelt av Michelle Yeoh (Snikende tiger, skjult drage og Memoirs of a Geisha) og David Thewlis (Harry Potter-serien, War Horse).