A-laget i trening igjen

Måndag kveld leia Øyvind Steffensen si første A-lagtrening i Os. Etter ein dryg månad med ferie stilte 14 mann på trening, inkludert Bryne-spelar Mats Cato Moldskred.

- Vi har ferie no, så det passa bra at eg fekk halda formen saman med gamle lagkameratar, seier Moldskred.

Trass i 10 minusgradar og hard bane synes både Mats, Øyvind og fleire av Os-spelarane at det var godt å koma i gang igjen.

- Det var nok ferie no, synes Christian Almeland.

Den tidlegare Fyllingen-spelaren er den einaste av spelarane frå bergensregionen som blir verande i Os etter årets nedrykkssesong.

Kalstad held seg i 2. divisjon
Tom Skråmestø, som berre var på banen tre gongar for A-laget i år (til saman rett over 60 speleminutt), går tilbake til Baune. Endre Brenne skal truleg flytta frå Bergen, og kjem uansett ikkje til å halda fram i Os.

Daniel Kalstad, den raske kantspelaren som blei flytta fram i angrep, noko som i sterk grad var med på å gje Os ein god haust, held seg i 2. divisjon.

- Eg har nettopp blitt flytta frå Madla til Håkonsvern og har vore heldig og fått stilling som idrettsassistent. Når det gjeld fotball er det ikkje heilt i boks enno, men det ser ut som om det er ganske sikkert at eg kjem til å spela 2. divisjonsfotball i Bergen neste år, seier han.

- Bygger eit Os-lag
Om nokre av bergensarane tar turen er det likevel bra med stabilitet i Os-laget. Ringrevar som kaptein Stian Lunde og midtbanespelar Frode Buvik blir verande. Tore Valvik er førebels usikker.

Midtstoppar Per Søgnen Merai blir i Os, forsvarskollega Dani Alvær Bergstø var også på trening i går, og blir truleg verande.

- Vi er ikkje nedover til Bergen og ser etter spelarar, vi vil bygga Os av Os-spelarar, og har mange gode ungdomar å ta av, seier Steffensen.

Mindre stall
Felles for dei Os-spelarane Midtsiden har snakka med er at dei har tru på både den nye trenaren og på opplegget dei har fått presentert.

Nytt for sesongen er at det blir tatt ut ein A-stall på rundt 20 spelarar. Os 2-spelarane kjem til å trena for seg sjølv, men det er førebels ikkje bestemt kven som skal leia desse.

Øyvind Steffensen kjem ikkje til å ha assistenttrenar utanom keepertrenar Ketil Elvenes.

Ny førstekeeper?
Keeper Halvard Enes, som sto alle kampane utanom tre i årets sesong, seier han truleg legg opp.

- Med familie og kone som reiser vekk på jobb blir det vanskeleg å få trent skikkeleg. Dessutan er dei yngre spelarane så flinke at det er på tide at dei slepp å konkurrera mot ein 34-åring som meg.

- Men det kan jo henda at det kriblar så mykje om nokre månadar at eg ikkje klarar å halda meg unna, legg han til.

Keeperane Kjetil Hansen og Anders Solberg Strønen blir begge verande, i tillegg får dei med seg keepertalentet Frode Øvredal.

Usikre backar
Venstreback Remi Osebakken, som etter Stian Lunde hadde mest speletid førre sesong, seier han har vore i dialog med Fyllingen, klubben avtroppa Os-trenar Frank Hellevik no skal vera med å trena. Men Os er framleis aktuell for fusingen.

Fyllingen skal ha vore i kontakt med fleire Os-spelarar.

Høgreback Anders Glesnes trener med Åsane, men seier han vil spela med Os om han ikkje får kontrakt med 2. divisjonsklubben.

I lista under finn du alle med speletid på A-laget i årets 2. divisjonssesong. Blant desse er det framleis nokre vi ikkje har snakka med, og nokre som ikkje har bestemt seg.

SPELARANE OG STATUS FOR 2011
(Rangert etter speletid i 2. divisjon i år)

Stian Lunde (kaptein) - Blir i Os
Remi Osebakken - Fyllingen eller Os
Halvard Enes - Legg truleg opp
Frode Buvik - Blir i Os
Daniel Kalstad - Går frå Os til 2. div. i Bergen
Per Søgnen Merai - Blir i Os
Torkel Hjertnes - Blir i Os
Vegard Leikvoll Moberg - Blir truleg i Os
Dani Bergstø - Blir i Os
Anders Glesnes - Åsane eller Os
Endre Brenne - Går frå Os/flyttar truleg frå Bergen
Tore Valvik - Usikker
Tim Sperrevik - Lagt opp, blir G16-trenar i Os
Preben Borgen - Blir i Os
Erik Kanestrøm - Blir i Os
Mats Lepsøe - Var på trening med Os måndag
Baste Jonasen - Har gått til Lysekloster (5. div)
Christer Olsen - Blir i Os
Kjetil Hansen - Blir i Os
Ramo Racic - Var på trening med Os måndag
Einar Algrøy -
Christian Almeland - Blir i Os
Tom Skråmestø - Har gått tilbake til Baune
Espen Kolås - Legg kanskje opp
Martin Eidsvik - Blir i Os

I tillegg til desse er blant anna keeperane Anders Solberg Strønen og Frode Øvredal aktuelle for A-stallen.