- 17. mars 2021

Lagkameratane frå 1960-talet med overrasking til Steinar Sagen

Den hemmelege gratishaugen til Os Fotball blei skilta og avduka.

Steinar Sagens plass er no skilta. (Foto: Harald Nøss)
Kjetil Vasby Bruarøy
Kjetil Vasby Bruarøyonsdag 17. mars 2021 14:26

Dei var kretsmeistrar som juniorar i 1969 og vaks opp som stamma til A-laget som spelte i 1. divisjon (øvste nivå den gong) i 1975.

I dag er dei turkameratar. Kvar tysdag går troppen, som varierer frå 7 til 12-13 mann, ein runde i bygda som er overkomeleg for godt brukte fotballbein.

Gårsdagens tur blei ei økt for seg sjølv.

Sat på Liafjellet for å sjå Steinar Sagen skåra mål

– Vi fekk høyra på ein av dei tidlegare turane at Liafjellet har blitt brukt som «gratishaug» under Os-kampar, fortel Harald Nøss.

Steinar Sagen var på ein bursdagsfest for eit par år sidan, då ein kar kom bort og fortale at dei var ein gjeng som gjekk til Liafjellet med kikkert for å følgja med. Spesielt då det var mykje folk på Kuventræ.

Utsikta frå Steinar Sagens plass. (Bilde frå 2015, foto: Kjetil Vasby Bruarøy)

Statistikk i jubileumsboka frå 2005 viser at det var frå 4.200 til rekorden på 8.071 tilskodarar på dei 10 mest folksame kampane til Os den gong.

– Det var nok spesielt Steinar dei følgde med på, i tillegg til dei to kometane Erik Just Olsen og Svein Gunnar Rein. Steinar var ein veldig god angrepsspelar og er ein spesielt kjekk og folkeleg fyr, seier Harald om kameraten.

«Steinar Sagens plass» fekk skilt

Kameratflokken døypte raskt utsiktsplassen på nordsida av Liafjellet til «Steinar Sagens plass».

I førre veke var Steinar opptatt, og kunne ikkje vera med, dermed fekk resten av det gamle drøymelaget tid til å planlegga eit stunt.

Kullet som utgjorde juniorlaget i 1969 er i dag turkameratar. (Bilde frå jubileumsboka, fotograf ukjent)

På Steinar Sagens plass står det ein benk frå før. Nøss spurde Os Turlag om lov før han fekk laga eit skilt.

Gårsdagens tur gjekk frå Kiwi, over tunellen mot Liafjellet. Då var det fram med skiltet, to skruer og ein mobiltelefon til å filma med.

– Eg er ikkje sånn tilhengar av denne typen merksemd, men sånn er det med denne gjengen, seier Steinar og ler.

– Det var jo veldig kjekt òg! Dette var nok ikkje ein plass der det sat publikum så ofte, men det var kjekt å høyra at nokon faktisk sat her for å sjå kampane våre på 1970-talet.

– Eg kan jo forstå det, for det var veldig fullt på Kuventræ, og ingen andre «gratishaugar» enn nokre tretoppar som enkelte klatra opp i.

Aktivt venskap i 60 år

Sagen seier han set stor pris på tysdagsturane med gjengen han har vore lagkamerat med sidan 1960-talet.

– Harald Nøss er flink å dokumentera og Hans Bøthun er god på planlegging og initiativ. Av og til er Davy Wathne med oss òg, han sit jo på enorm kunnskap og interesse for fotball, òg frå vår tid.

Det einaste som ikkje var kjekt med turen, gjekk ut over Nøss sjølv.

– Han planta jo hovudet ned i ei rot, men slapp heldigvis frå det med eit sår på nasa.

Spøkefuglen Harald Nøss ramla, men kom nesten uskadd frå det. (Privat foto)

Bli medlem du også!

Di støtte gir liv til lokalavisa vår.

  • Tilgang til alt innhald
  • For heile familien (6 pers)
  • Utan bindingstid
  • Berre 30 kr per veke
Teikna abonnement

Abonnementet blir fornya kvar 4. veke for kr 120 per månad. Du kan seia opp kor tid du vil, og blir då ikkje belasta for neste periode.