Lagt i grus før 10-årsdagen

Steinsenteret er flytta til nytt lokale i Kolskogen og bygget på Gudriflaten må vika for komande Kiwi-butikk.

– Eg hadde trudd at bygget skulle stå i meir enn 10 år, seier Stig Totland, som opna Steinsenteret i eige nybygg i mai 2003.

– Men sånn er det med Norgesgruppen, dei betaler godt for ei god tomt og bygger sitt eige.

Knekker av plate for plate

Totland sit no i nabobygget, der han har kontor, og ser på rivearbeidet.

– Det er litt trist, men samtidig er det fascinerande å sjå kor flink maskinføraren er.

– Han tar plate for plate og legg fint i kontaineren.

– Sortering er str del av jobben

Det er Rivenes AS som står for rivinga, som starta for alvor i går.

– Handverkarjobben med riving er ganske omfattande, og er førebels ikkje ferdig. Vindauga er ute, men det står igjen litt elektronikk, fortel Øystein Kvamme.

Og det er ikkje berre glas og leidningar som skal sorterast.

– Vi kunne rive bygget på mykje kortare tid, men då ville vi stått på vekesvis med sortering etterpå.

– Det meste skal sorterast, og maskinføraren tar dette medan han river, i staden for etterpå.

Det er førebels uvisst kor tid det blir byggestart på ny Kiwi, men butikken skal opnast i løpet av 2013.