Måneformørkinga var først vanskeleg å sjå, men etterkvart som månen kom ut av skyggen blei det eit vakkert syn, som her i 23.30-tida. (Foto: Liv-Randi Lind)

Lang, låg og lekker måneformørking

– Den var vanskeleg å sjå, men i det formørkinga var over lyste månen flott opp, seier naturfotograf Liv-Randi Lind.

image
image
Av: Kjetil Vasby Bruarøy

Torsdag kveld var månen raud og veldig synleg, fredag kveld skulle vi få oppleva noko som ikkje skjer igjen før om 105 år.

Måneformørking skjer oftare, gjerne fleire per år, som i 2014 og 2015, då vi hadde to totale formørkingar i året.

Men denne var uvanleg lang, århundrets lengste.

I tillegg ligg planeten Mars nærmare Jorda enn på 15 år, noko som er med på å farga Månen raud.

Låg og dekka av skyer

To av fleire som rigga seg til for å fotografera den lange måneformørkinga var ekteparet Liv-Randi Lind og Oddmund Lunde. Dei erfarne naturfotografane tok turen ut i båt, Oddmund bak roret og Liv-Randi med kamera.

– Ut frå kvar vi såg den fine månen kvelden før hadde vi kalkulert cirka kvar den ville koma opp, litt vest for Tysnessåta sett frå Bjørnafjorden. Vi la oss til litt utanfor Vernøyane, og der blei vi liggande å venta.

Det som gjorde måneformørkinga vanskeleg å sjå var at den var lågt på himmelen, og at det var litt skodde og nokre låge skyer.

– Først då formørkinga så vidt var over, og vi såg det første sollyset treffa månen igjen, la vi merke til det mørke og raude partiet på resten av månen.

– Det vanlege er òg vakkert

På ganske stille fjord, men med lett gynging i båten, var det noko krevjande fotoforhold.

– Vi vurderte å gå i land, men då vi ikkje var heilt sikre på kvar månen var tok vi ikkje sjansen.

Liv-Randi fotograferte med 70-200 mm på 1600 iso, for dei som er fotointeresserte.

– Vi hadde med oss større brennvidde, men då stativet ikkje sto på land var det ikkje forhold for å bruka desse. Ein del av bilda blei ubrukelege, men vi fekk heldigvis tatt eit par litt fine.

Liv-Randi har vakse opp i Vesterålen, men det er først i 2015, i si nye heimbygd Os, at ho tok bilde av nordlys for første gong. Resultatet ser du her.

– Naturfenomen er spennande og kan vera fine, men mens vi venta på å finna denne måneformørkinga tok eg bilde av den fine himmelen over Øyane.

– Då slo det meg at desse soloppgangane og solnedgangane vi har kan vera minst like fine, vi har heldigvis mykje å gle oss over og å ta bilde av mellom desse fenomena som ikkje alltid svarer til det vi ventar.

Fleire saker