Lefsebakeriet lagt ut for sal

I juni blei Vestlandslefsa-fabrikken på Bø stengt, i september blei fabrikken tømt for utstyr.

No er fabrikklokalet lagt ut for sal.

Prisen? 4,5 millionar kroner.

Bygningen, som blei reist i 1965, er på 1070 kvadratmeter, fordelt på 530 kvm produksjonslokale, 380 kvm lager, 125 kvm kontor og 35 kvm kjellar.

Rask respons

"Hjemmelshaver og eier til eiendommen er Rieber og Sønn ASA. Salget vil bli gjennomført som et ordinært eiendomssalg" står det i annonsen.

– Annonsen blei publisert i går og vi har allereie hatt grei respons. Vi legg opp til ei fellesvising i neste veke, fortel eigedomsmeklar Lars Erik Wirsching i DNB.

Tomta er på 7,2 mål og området er regulert til industri.

Nabobygget kjem også for sal

Nærmaste nabo til lefsefabrikken, eigedomen som smeden Johs Sælen & Sønn AS heldt til i før flytting til nytt bygg i Hegglandsdalen, skal også seljast.

– Eg har hatt interessentar, både på kjøp og leige, men har førebels ikkje rydda ferdig så eg må venta litt med å annonsera eigedomen, fortel Bjørn Sælen.