Lei av nattarbeid

Ein nabo til dyrka mark i Hegglandsdalen fekk i natt nok av bråk frå traktorar.

– Eg har kontakta politiet, for det har berre blitt verre og verre, fortel han til Midtsiden.no.

Ifølgje innringaren har det vore jobba på ulike jorde nær huset hans tre seine kveldar denne veka.

– I natt var det ekstra gale, då var to traktorar i sving til rundt klokka eitt. Dei tenkjer tydelegvis ikkje på at dei har naboar som skal på jobb tidleg om morgonen.

– Bruk fornuft

Politiet har ikkje vore i kontakt med traktoreigarar i nabolaget i dag, men seier dette er å uroa normal nattero.

– Vi forstår at enkelte jobbar litt utover kveldane, spesielt no om sommaren når det er lyst. Men det er vanleg å ta såpass omsyn til naboane, å visa såpass med folkeskikk, at ein dempar seg innan klokka 23 om kvelden, seier politioverbetjent Terje Sperrevik.

– Samtidig har ikkje vi alltid kapasitet til å vera "støy-politi" i kvart nabolag i Os, anten det er snakk om høg musikk eller bråk frå arbeid. Naboar kan gjerne kommunisera direkte seg imellom om dei har noko på hjartet, det ordnar seg ofte fint på den måten òg.