Leif Nyland til Vedholmen Galleri

Dagleg leiar ved Vedholmen Galleri, Vibeke Harild, kan sjå attende på ein spesiell sommar.

Årets sommarutstilling var med ingen ringare enn den populære og folkekjære Oddvar Torsheim. Allereie på opninga 20. juni var nesten halve utstillinga til Torsheim seld.

Harild anslår at om lag 200 menneske var innom på sjølve opningsdagen, og interessa heldt seg oppe i vekene etterpå.

– På dei fire vekene utstillinga til Torsheim stod her opplevde vi publikumsrekord. Trass i koronarestriksjonar har rundt 900 publikummarar sett utstillinga, og ofte har det vore kø både før og etter opningstid. Dette er jo sjølvsagt berre kjekke utfordringar, og det har vore ei stor oppleving å sjå så mange smilande og glade kundar på galleriet.

Salet har òg vore «over all forventing».

Som med mykje av kunstverda elles, kan Harild fortelja at koronanedstenginga òg har sete sitt preg på galleriet i Øyane.

– Jo, det har vore utfordrande. Mellom mars og mai var det lite sal, og det vart nokre nervøse netter med lite søvn. Då var utstillinga og opplevinga med Torsheim fantastisk og inspirerande. Det heile varma mentalt, og med god hjelp frå kultureininga i Bjørnafjorden kommune rundt opninga, dei gode sponsorane mine, og med noko støtte frå regjeringa si krisepakke vart det til slutt ein god sommar som gallerist.

Fredrikstad til Øyane

På laurdag er det klart for haustens første utstilling. Då er det duka for Leif Nyland si første separatutstilling på Galleri Vedholmen. Nyland har tidlegare stilt ut arbeid på Vedholmen, men dette er altså første gongen han stiller ut åleine.

Nyland er utdanna innan grafikk og visuell kunst på Kunsthøgskolen i Oslo. Dei seinare åra har Nyland blitt eit ettertrakta namn i kunstverda, og utstillinga på Vedholmen er den første han gjer på vestlandet.

– Måleria til Nyland er inspirerte frå område rundt Fredrikstad, men du finn faktisk tre «snapshots» frå Søre Øyane blant motiva, fortel Harild.

Nyland seier sjølv dette om arbeida sine:

«Å bygge et bilde. Som i et slags stort studio ligger motivene mine. De fleste er i en omkrets på noen hundre meter. De blir egentlig bare sett av meg, tror jeg. Men jeg vil gi dem noe ekstra. En bonus for tomheten og et enda større pluss for at de er akkurat der de er.»

Klassisk påfyll

Under laurdagens opning vil Leif Nyland sjølv vera tilstades, og det vil vera mogleg å sjå utstillinga fram til 13. september.

Til å tonesetja opninga har Harild og Vedholmen Galleri booka gitaristen Andreas Grønli.

– Vi vart tipsa om Grønli frå «husgitaristen» vår, Manar Alhashemi, fortel Harild.

Grønli er ein gitarist frå Steinkjer i Trøndelag. Han er utdanna innan musikk, og har mellom anna spelt med ei rekkje norske artistar som Alejandro Fuentes, Torstein Sødal og Maria Arredondo. Grønli har òg vore finalist i «Fjord Candenza», Noregsmeisterskapen i klassisk musikk for musikarar under 18 år.