Leiger eksperthjelp
– Det er ikkje så ofte at trenarar ber andre sjå seg i korta på denne måten, seier Daniel Birkelund.
Os Turn Handball har engasjert Daniel Birkelund som trenarutviklar. Birkelund er berre 33 år, men har fartstid som assistenttrenar i eliteserien og som landslagstrenar på alderbestemt nivå.
– Vi er på jakt etter god input, vi vil styrka oss sjølv så vi er betre rusta til å utvikla handballdamene på eit høgare nivå, seier Erlend Lyssand.
Lyssand trener damelaget til Os saman med Torbjørn Bøthun. No skal dei med fast frekvens få innspel og justeringar av Birkelund.
Gode referansar
Birkelund seier han ikkje har noko særleg karriere som spelar å sjå tilbake på, men han har vore trenar på dei fleste nivå, frå 12-åringar til eliteserielag og aldersbestemte landslag.
Han er opprinneleg frå klubben Årstad, men har blant anna vore med og trent Stord og Bjørnar, som han var assistenttrenar for i tre år. Bjørnar rykte opp til eliteserien i den treårsperioden.
Daniel har trenar 5-utdanning, den høgaste du kan ta. Han er lærar på Tertnes Håndballgymnas.
– Vi høyrte mykje bra om Daniel av talent frå Os som har han som lærar, som Eva Kristiansen og Anna B. Kallestad, fortel Erlend.
– Og vi fann fort ut at vi har bra kjemi.
– Tøft av dei
Birkelund seier han ikkje ville vore interessert i oppdraget om det handla om trenarjobb, men å følgja Erlend og Torbjørn gjennom sesongen var ei løysing som kunne passa inn mellom timane på Tertnes og med aldersbestemt landslag.
– Eg har sans for opplegget og eg synes det er ein smart måte å gjera det på.
– Det er tøft av dei to, det er ikkje alle trenarar som tør å ta inn andre andre for å bli sett i korta. Dei er audmjuke og opne og oppriktig interesserte i å bli betre i det dei driv med, det har eg sans for.
Tydelegare struktur
Torsdag var Daniel i Oshallen for å sjå Erlend og Torbjørn leia Os i treningskamp mot Volda.
– Kva ser du etter når du skal koma med vurdering og tips til trenarar?
– Det er ikkje programfesta akkurat kva vi skal jobba med, vi kjem til å ta det etterkvart som eg ser kva justeringar dei to kan vurdera.
– Eg er ikkje i Os for å snu opp-ned på noko, men for at trenarane skal få stadfesta kva dei gjer rett og plukka ut noko som vi skal jobba vidare med. Alle kan bli betre i alt, men vi kjem berre til å ta ut nokre få viktige ting å jobba med, fortel Daniel Birkelund.