Let lemstova stå

Utvalsmedlemmane gav uttrykk for at dei synast dei hadde ei vanskeleg oppgåve framfor seg då dei var på synfaring på Lyngheim torsdag morgon. Der møtte dei søknadsansvarleg og naboane for å høyra deira syn, i tillegg til å sjå med eigne auge korleis lemstova har tatt form.

- Vi skulle gjerne ha vore denne runden forutan og kan berre beklaga at det blei gjort målefeil då lemstova blei tatt ned inne i Hegglandsdalen, sa Bjørn-Atle Drange frå Abo plan og arkitektur. Drange og Abo er ansvarleg for søknaden.

Les òg: Byggestopp på Lyngheim

Han argumenterte for kvifor høgda måtte bli 18,8 og ikkje 17,5 som i den opprinnelege søknaden. Stiftinga har seinere fått godkjent mønehøgde på 17,8 meter.

Ruvar i terrenget

Naboane, representert med Anita og Otto Lekven, fortalde at dei hadde akseptert høgda på 17,5.

- Huset såg fint ut med den opprinnelege høgda, men no ruvar det i terrenget, meinte Lekven.

Dei reagerte òg på at det var naboane som måtte be om kontrollmåling og at ikkje tiltakshaverane hadde kontroll på dette sjølve.

- Det kan nesten sjå ut som om dei berre har heldt på og rekna med å få tilgjeving i etterkant.

Fekk tilgiving

Og nettopp tilgjeving fekk Det historiske tunet på Lyngheim då politikarane kom seg inn igjen i varmen på rådhuset.

- Ap vil gå inn for mønehøgde på 18,8 meter då vi meiner den ikkje vil vera til vesentleg sjenanse for naboane, sa Harald Døsen (Ap).

- Eg synast det er frykteleg beklageleg for naboane. Vi har eigentleg to val, la det stå eller riva det, å senka det ein meter går ikkje.

- Etter mykje fram og tilbake har eg enda på at eg vil gå for den nye høgda, sa Jonny Garvik (H).

Han fekk støtte frå partifelle Ståle Skaatun, som òg meinte at det hadde vore ein vanskeleg sak, men at ulempa var mindre enn fordelane.

Gustav nesten åleine

Den som argumerte sterkast for å støtta administrasjonen sitt framlegg til vedtak om ikkje å godkjenna den nye mønehøgda var tidlegare leiar i utvalet, Gustav Bahus (Frp).

- Dette arbeidet blir gjort på dugnad, det må vi ha med oss. Men likevel er det klønete, og som Bjørn-Atle sjølv sa, pinleg, at dei ikkje har klart å halda seg til den godkjende høgda.

- Vi jobba mykje og hardt for å senke husa bak då dei blei godkjente. Det var ikkje smertefritt, derfor støttar eg administrasjonen sitt framlegg, argumenterte Bahus.

Også Terje Sperrevik (TvS) ville normalt sagt nei til den nye mønehøgda, men konkluderte med at også han ville seie ja.

- Det arbeidet som har vore gjort i samband med prosjekteringa står til stryk, men det blir for strengt å berre ta omsyn til dei to husa bak, sa Sperrevik.

Plan- og bygningsutvalet godkjende den nye mønehøgda på 18,8 meter med 7 (Ap, V, TvS, H, Frp) mot 2 (Frp) stemmer.