Lett å avsløra ulovleg xenon-lys

Statens vegvesen hadde trafikkontroll tre stadar i Os, frå klokka 8.30 og ut dagen i går.

– Vi starta ved den gamle brannstasjonen og heldt fram i Industrivegen og ved Vognhallen, fortel Lars Harald Drange.

Berre 5 av 476 kontrollerte fekk gebyr for manglande bruk av bilbelte. Éin blei avskilta då vedkomande ikkje hadde omregistrering i orden.

– Vi stoppa også ein bil med for tungt brøyteskjer. Skjeret var også plassert så det skjulte kjennemerket på bilen, og bilen såg ut til å vera i så dårleg stand at den må inn til full teknisk kontroll.

510 kroner for ulovleg xenon

37 bilar blei kontrollert for lysbruk.

– Her var det ein del feil på bruk og utstyr. Særleg dette med ulovleg etterinstallering av xenon går igjen.

Det er ikkje lov å bruka xenonpærer i lyskasse meint for halogen.

– Det er lett å sjå om lyskassen er ok for xenon eller ikkje. For det første skal dei vera merka, for det andre skal dei ha både spyling og automatisk høgdejustering. Har du brytar i bilen for manuell høgdejustering er det ein indikator på at du ikkje kan ha xenonpærer.

Årsaka er at xenonlys er så mykje skarpare at ved feil kurve på lysa eller ved skit som gir spreiing av lyset, er det fare for blending av møtande trafikk.

– Tidlegare var det eit problem at bilistar som blei tatt med ulovleg xenon skifta pære, viste bilen hos vegvesenet og plasserte dei ulovlege xenonlysa tilbake på bilen.

– Men no er det sånn at du, når du må visa bilen med rette pærer, også må betala 510 kroner, fortel Drange.