Leverte beslaglagte teiner til politiet

Bildeserie:

1 av 3

I dag var Kystvakten i Os hamn med «HPB 3», ein av dei fem hurtiggåande patruljebåtane som Sjøforsvaret har til Kystvakten-skipa sine.

Mannskapen leverte 17 teiner som dei tok beslag i då KV Njord var på patrulje i Øyane dagen før hummarfisket starta.

Les òg: – Enkelte klarer dessverre ikkje å venta

– Njård har vore på verkstad, så vi fekk ikkje levert beslaget før no. Patruljeringa i og rundt Bjørnafjorden held fram, seier operasjonsoffiser, kapteinløytnant Jan Erik Skorpe til Midtsiden.

Mistenkte er frå Os

Kystvakten har meldt forholdet og teinene er merkte. Hos Os lensmannskontor er dei førebels sparsomme med detaljar.

– Éin mann er mistenkt, men vi har enno ikkje hatt vedkomande inne på avhøyr, seier politioverbetjent Audun Hadler-Olsen.

Han stadfestar at vedkomande er frå Os, men vil ikkje ut med verken cirka-alder eller om alle dei 17 teinene er mistenkte sine.

Du har ikkje lov til å bruka meir enn 10 hummarteiner, med mindre du er yrkesfiskar.

– Ikkje det einaste tilfellet

Hadler-Olsen seier det ikkje har vore spesielt mange meldte tilfelle av ulovleg fiske i haust.

– Men dette er ikkje det einaste. Vi har blant anna to saker frå Hatvik i september, og det er ein del beslaglagt fiskeutstyr i garasjen vår for tida.