Lindborg blei leiar i Bjørnafjorden Ap

Os Ap og Fusa Ap hadde onsdag ettermiddag sine siste årsmøter.

Der avslutta dei lokal-laga og oppretta det nye Bjørnafjorden Arbeidarparti.

– Reint teknisk så blei Fusa Ap lagt ned og Os Ap skifta namn til Bjørnafjorden Ap.

– Vi hadde eit fantastisk godt stiftingsmøte med god og fin stemning. Det var ein smekkfull kommunestyresal med mellom femti og seksti frammøtte, fortel Trine Lindborg, som blei vald som den første leiaren av Bjørnafjorden Ap.

Ny giv

Lindborg fortel at ho opplevde ein ny giv og gler seg til å ta fatt på arbeidet fram mot valet i 2019.

– Det nye styret blei vald for eitt år, noko som kan vera greitt no i oppstarten. Vi skal bygga eit nytt lag og dra i sama retning.

– I talen min etter valet så sa eg noko sånn som at no har vi fått på oss same drakta og skal spela mot det same målet. Då må vi ha klart for oss kor målet står.

– Vi skal ha færrast mogleg på innbyttarbenken og ingen i garderoben. Det gjeld å få flest mogleg på banen, slik at alle er med.

Det nye styret

Det var kun Lindborg, som leiar, som blei vald onsdag. Resten av styret skal konstituera seg sjølv på det første styremøtet.

I tillegg til Lindborg blei Anne Frotveit, Pål Tore Haga, Geir Ove Lunde, Amalie Lindborg Bøyum, Viggo Furebotn, William Lindborg, Ranita Styve Årvik og Agnete Digarnes Årvik vald som faste representantar.

– I tillegg har vi tre faste varamedlemmar og ein møtande frå AUF på styremøta, avslutter Lindborg.

Også nominasjonsnemd og programkomité blei vald onsdag kveld.