Lite cash i omlaup

For to veker sidan sette Os Røde Kors, som del av ein av årets to landsomfattande aksjonar, ut 28 bøsser på butikkar, bensinstasjonar og andre folksame plassar i kommunen.

Inntekta gjekk til det som er den største svoltkatastrofen på 70 år, til Aust-Afrika og Jemen, der 30 millionar er ramma av svoltkatastrofe.

I Os blei det samla inn 4330 kroner, i snitt rett under 155 kroner per bøsse.

I tillegg kjem 25.000 som Os Røde Kors har gjeve til aksjonen.

• Les òg: Var ikkje falsk bøsseberar likevel

– Lite kontantar i omlaup

Måndag blei bøssene samla inn, i går blei pengane talte opp.

– 4330 kroner høyres ikkje så mykje ut, men det er heller ikkje mykje kontantar i omlaup for tida.

– Eg synest summen er fin, og vil takka alle som har gjeve støtte til aksjonen, seier Kristian Strønen frå Os Røde Kors.

– På landsbasis var det 22. september kome inn heile 6,4 millionar kroner. Vi har dessverre ikkje sjanse til å henta ut lokale tal, men eg håper og trur at fleire frå Os har fått med seg aksjonen og gjeve støtte via Vipps, sms eller direkte på konto, seier Strønen.