Åt for lite taco

– Nei, vi skal ikkje hoppa, seier fire gutar som vandra over Lepsøybrua i berre underbuksa laurdag kveld.

Fleire bilistar som passerte hadde vinka, andre stoppa for å forsikra seg om at ikkje det var hopping på gang frå den høge brua. Badarar har blitt stoppa av politiet før.

– Vi har berre tapt eit veddemål, forlarer dei.

Taco-fest gjekk skeis

Dei fire vandrarane, Odd Martin Reilstad, Peter Tveita, Sigurd Kaslegard og Halvard Brundtland, er alle elevar på andre trinn ved Kongshaug Musikkgymnas.

Veddemålet gjekk ut på å eta mest taco. Dei som åt minst måtte gå over brua i underbuksa.

– Mange av dei rundt 120 elevane på skulen er heime i helga, derfor var det ekstra mykje taco til oss 40 som var igjen. Då plar vi eta mykje, men vi åt tydelegvis ikkje nok.

– Men de takka ja til å delta på veddemålet?

– Eh. Veddemålet var faktsk vår idé. Vi ser jo no at det ikkje var ein god idé, ler dei fire.