Lokalpolitiker Espen Aspenes (t.h.) trur oppgraderinga av sentrum, med nytt restaurantbygg, vil gi effekten Os kommune ønskjer. (Foto: Kjetil Vasby Bruarøy)

Livet på Øyro blei undervurdert

– Som å vera på ferie, seier gjestane. – Alt anna enn ferie, humrar drivarane etter tre dagar med opningsfest i Os kommune sitt nybygg på Torget.

image
image
Av: Kjetil Vasby Bruarøy

Laurdag formiddag opna restauranten Havnechefen i nytt lokale i Os kommune sitt nybygg «Osroso» på Torget.

Same dag var det Vårslepp i sentrum og restauranten blei fylt opp til langt ut på kvelden.

• Les òg: Pangstart for Havnechefen

Så følgde ein like god søndag og ein måndag 1. mai som nesten på tusenlappen hadde like høg omsetnad som dei to første dagane.

– Eit hektisk eventyr!

Restauranteigarane takkar kundar for både besøk og tolmod den travle opningshelga.

– Tilbakemeldingane er fantastiske, både på plassen og på maten. Vi var førebudd på at det skulle bli travelt, men dette liknar ikkje på noko vi har vore med på før, seier dagleg leiar Reidun Vasby.

Inn mot opningsdagen støtte dei på enkelte utfordringar. Då dei skulle ha opplæring på kassasystemet viste det seg at internettet ikkje var på plass likevel, og leverandøren måtte reisa tilbake til Stavanger og køyra opplæring via webkamera dagen etter. Kjøkkenskrivaren var ikkje i drift på opningsdagen, dermed blei det tett mellom dei gule lappane på hylla til kokkane.

– Det kom seg søndag, då hadde vi dessutan utsett opninga til klokka 13 for å koma oss litt ovanpå. Måndag hadde vi hyra inn ekstra bemanning, og var heldig og fekk tak i ein som både er servitør, kokk og hovmeister. Han blir med oss vidare, både som arbeidskraft og til å drilla oss andre så vi får best moglege rutiner.

– Eg vil òg takka naboar, frå Marianne i Os Blomsterservice, som har dekorert heile uteserveringa vår, til Engeline, som har lånt oss varer, og Joker, der vi har fått påfyll i runde etter runde.

Liv på Øyro-effekt

Det var forfall og mykje nedlegging av butikkar i Os sentrum som fekk Os kommune til å etablera prosjektet «Liv på Øyro». I 2014 blei resultata av stads- og moglegheitsstudie av Asplan Viak presentert, der dei delte Os sentrum inn i ulike «drag».

Eitt av draga, gata Øyro, som går frå den gamle brannstasjonen til det gamle bankbygget, blei anbefalt å starta med. Her blei det full utskifting av rør i grunnen før nytt dekke, stein frå Portugal, kom på plass. Baldakiner langs fleire av bygningane er på plass og fleire kjem.

Bygget på torget er del av prosjektet. Nye teikningar var klare i juli 2016. Takterrasse med heissjakt kom til seinare.

– Os kommune har med dette utført eit stor løft for sentrum, seier kommunestyrerepresentant Espen Aspenes (Frp), som i går tok seg ein middag med vener på den nye restauranten.

– Det ser verkeleg ut som om dette gir effekten vi ønskjer, det å sitja her er som å vera på ein fortausrestaurant når du er på ferie, solrikt og med folk og bilar som kjem forbi. Med dette dekket av stein og den nye innreiinga av gatene er trafikken på fotgjengar sine premisser.

Større meny og bygging av takterrasse

Havnechefen held fram med ope sju dagar i veka. Samtidig fortel dei at det vil bli litt byggearbeid i vekene fram mot 17. mai.

– Takterrassen skal gjerast ferdig før 17. mai, så det kan bli litt å ta omsyn til for oss og gjestane enkelte dagar.

Restauranten har 48 plassar inne og 72 ute. På taket kjem nesten 100 til.

– Vi har fått inn mange bordbestillingar fleire veker fram, også til takterrassen 17. mai. Heldigvis starta vi med berre delar av menyen, men den bygger vi på med fleire rettar i vekene som kjem.

– No er vi spente på korleis vekedagane skal sjå ut for den nye restauranten, samtidig som vi har ein del varer å bestilla etter opningshelga.

Fleire saker