LOL-brørne hylla av Datarock

Bildeserie:

1 av 9

I juli blei Søfteland Rock N LOL runda av etter 7 vellykka festivalar på Søfteland.

Laurdag 21. september var det gravøl og fest, ein fest arrangørane kunne vera med på, i Oseana.

Jens Aasmundseth (frå The Beauty og Major Parkinson) sto for vorspielet på Peppes, Cockroach Agenda og Bone Shakers, sistnemnte med Andreas Lindborg på trommer, varma opp for Datarock i Oseana.

Før Datarock entra scenen kom ordførar Terje Søviknes med ein fin liten tale til festival-brørne, og overrekte kvar sin bukett.

Ekstranummer på dansgolvet

Så kom Datarock med "bukett" etter "bukett", superlativ som perler på ei snor, til festivalen og til Os Rockeklubb.

– Søfteland er blant våre absolutte favorittar, sa Fredrik Saroea.

– Vi har blitt utruleg godt mottatt og fått veldig proff service på Rock N LOL. Er de klar over kor utruleg fine folk de har her på Os? Sjå berre på trommesettet Kjetil Osablod Grønvigh har rigga til meg. Det er Os Rockeklubb sitt og det beste eg har spelt på, sa Tarjei Strøm.

Datarock serverte hit etter hit, fekk publikum med på allsong og dans (!), gav ekstranummer og tok dei siste låtane ute på dansegolvet.

Datarock organiserte også stagedive, kanskje Oseanas første, for Andreas Fosse Salbu frå Cockroach Agenda, som fylte 18 år i løpet av festen.

– Ei fantastisk avslutning!

Brørne Lindborg er strålande nøgd med festen, ein fest Datarock meiner bør bli tradisjon, gravøl for LOL kvar september i Oseana.

– For det første var det utruleg fin setting i Oseana, og knallgod lyd, noko som er ekstra kjekt for oss som spelte, seier Andreas, som også er trommis for oppvarmingsbandet Bone Shakers.

– For det andre er vi utruleg takkasame for korleis Datarock drog opp stemninga låt for låt, for alt det fine dei sa mellom låtane og for måten dei fekk med seg publikum på.

Fredrik Saroea og Tarjei Strøm inntok nesten ei konferansier-rolle og runda av med Andreas, William og musikarane som hadde vore på scenen tidlegare på kvelden på scenen, til låta "Time of my life" frå Dirty Dancing.

Rundt 300 var med på festen, noko færre enn det Lindborg-brørne hadde håpa på.

– Vi hadde håp om at vi skulle bli oppunder 500, men det var mykje anna som skjedde i helga og 300 var nok til at det blei god stemning og ein skikkeleg fest.

– Den harde kjerna, grom-LOL-arane, var der. Det var viktigast for oss, seier Andreas Lindborg.