Os Senioruniveristet: Mari Lyssand om Ole Bull i Oseana. (Foto: Kjetil Osablod Grønvigh)

In love with Ole Bull

Os Senioruniversitet starta haustsemesteret på måndag, og det med ei superstjerne i fokus.

image
image
image
image
Av: Kjetil Osablod Grønvigh

Ole Bull (1810-1880) er ingen ukjend mann for dei fleste, men han vert oftast sett i historisk samanheng med andre menn i si tid.

Så kva med kvinnene i Ole Bull sitt liv? Nettopp denne vinklinga var utgangspunktet for Mari Lyssand sitt foredrag om komponisten.

Lyssand er kjend frå arbeid som journalist og oversetjar, men mange kjenner ho òg som ihuga Ole Bull-entusiast. Heilt sidan ho i 1989 fekk sommarjobb som omvisar ved Museet Lysøen har ho blitt riven med av historia om livet til Ole Bull.

• VIDEO: 200 år av Os-soga på ca 10 minutt (Mari Lyssand, 2014)

I eit velregissert foredrag leia Lyssand tilhøyrarane på ei reise gjennom Ole Bull si historie, men med kvinnene i Bull sitt liv som hovudrolleinnehavarar.

Frå den strenge mora heime i Bergen, som lærte Bull å helsa på alle gjennom ein solid øyrefik, dei to myndige bestemødrene, som begge var enkjer, ein famøs sledetur i ung alder og vidare til internasjonal stjernestatus, kor det heitte seg at damene dånte og menn blei rørte til tårer når han spelte.

To koner, to skjebner

Lyssand sitt foredrag krinsa heile tida kring dei to konene til Bull; Felicité Villeminot Bull og Sara Chapman Bull.

Felicité var ei endelaus trist historie i skuggen av superstjerna Ole Bull. Ei ventande kone som aldri klarte å tola eller leva opp til rolla som maken til superstjerna Ole Bull.

Sara, ei 40 år yngre rikmanns- og senatordotter, var så langt frå Felicité som ein kunne koma. Ein far som var senator, ei politisk kvinnesaksaktiv mor i kombinasjon med ein politisk tydeleg Bull gjorde dette ekteskapet til ein politisk tungvektar.

150 år med kjærleik

Mot slutten mimra Lyssand attende til ei av mange visingsturar for turistar på Lysøen, kor ei lita italiensk turistfrue til slutt mota seg opp og kviskra til Lyssand: «are you a little bit in love with Ole Bull?»

Lyssand, til stor latter frå publikummet i Oseanasalen, måtte innrømma at «I am a little bit in love with Ole Bull, men det er bra at det er eit avstandsforhold. Og avstanden bør vera sånn ca 150 år…»

Spanande og innhaldsrik haust

Os Senioruniversitet kan by på ei rekke foredrag i semesteret som kjem.

Du kan få med deg Geir Olve Skeie sitt foredrag «Musikk og hjernen. Kan musikk lindra helseplager», Jimmy Næs sitt foredrag «Ingvar Moe, tekstar-tonar-tankar» og Ole Didrik Lærum sitt foredrag «Målaren Nils Bergslien og folkelivet».

Men først ut er Grethe Paulsen Vie, måndag 24. september, med sitt foredrag «Om lagnaden til dei reisande- og livet til sjøsplintane på Vestlandet».

Fleire saker